Protestoyê darbeye 12ê Êlule: Heta ke zulim bibo, do xoverdayîş zî bibo

• Darbeyê 12ê Êlule, vernîyê Hepisxaneyê Dîyarbekirî de bi malûmatêk ame protestokerdiş.

Darbeyê 12ê Êlule, serrgêra xo de xeylê bajaran de bi malûmatan protesto bi. Hetê Komeleya 78îyan a Dîyarbekirî ra vernîyê Hepisxaneyê Dîyarbekirî de malûmatêk ame dayene. Parlamenter û temsîlkarê partîyan beşdarê malûmatî bîyê. 

Hepisxaneyan ra cinazeyî vejîyenê

Verfekê Komeleya 78îyan a Dîyarbekirî Huseyîn Barişî va, “Mabên ra xeylê wext vîyerto la kerdenê 12ê Êlule hema zî yenê ramitene. Hem hiqûqê zereyî hem zî hiqûqo mîyannetewî binpay benê. Hema zî hepisxaneyan ra cinazeyî vejîyenê. Îşkenceyî dewam kenê, înfazî yenê vêşnayîş û tecrîd yeno ramitiş. Ganî darbekarî hesab bidê û bêrê cezakerdiş.”

Xoverdayîş ewro zî dewam keno

Parlamenterê HDPyî Îmam Taşçierî va, “Ewro zî vera Kurdan eynî polîtîkayî yenê ramitene. Heta ke meseleya Kurdan çareser nêba, çiyêk nêvurîyeno. Wextê darbeyî de 50 kesî ameyê îdamkerdiş û 300 kesî bi îşkenceyan ameyê qetilkerdiş. Tîya de, Hepisxaneyê Dîyarbekirî de Esat Oktayî îşkenceyê giranî kerdê. Ewro zî nê hêrîşî û îşkenceyî yenê ramitene. Xoverdayîşê hepisxaneyî yê ê wextî, xoverdayîşê pêroyê Kurdan bi. Ewro zî eynî xoverdayîş esto. Heta ke zulim bibo, do xoverdayîş zî bibo. Ganî Kurdistan û Tirkîya de şar vera zulmî xoveradayîşê xo pîl bikero. Meseleya Kurdan ganî bi rayîranê demokratîkan û bi aktoranê ci bêra çareserkerdiş.”

‘Girewteyan sere nêna ro’

Taşçierî peynî de va, “AKP bi viraştişê hepisxaneyan wesfê xo dano. Kurdan hepisxaneyan de sere û çok nêna ro. Kurdan heta nika sere nênayo ro û ewro ra têpîya zî do sereyê xo menê ro.”

Binê desê hepisxaneyî rê qerenfîlî ameyê ronayene û dima malûmat ame qedîyayîş.

MA / AMED