Şahidê 12ê Êlule: Teda bi xoverdayîşê Kurdan şikîyaye

Ceylan ŞAHÎNLÎ / MA / RIHA

Endamanê Înîsîyatîfê 78îyan ê Rihayî ra Vahît Akgun û Mahmut Manasî dîyar kerd ke tedaya 12ê Êlule bi xoverdayîşê Hereketê Azadîye yê Kurdan şikîyaye.

Darbeyê 12ê Êlule ser ra 43 serrî vîyertê. Darbeyî ra dima komeleyî, partîyî û rêxistinê sivîlî ameyê padayene. 230 hezar kesî ameyê mehkemakerdiş. 50 kesî ameyê îdamkerdiş û 171 kesî bi îşkenceyan ameyê qetilkerdiş. 14 hezar kesî hemwelatîye ra ameyê vetiş û 30 hezar kesî sey multecîyê sîyasîyî şîyî teber.

Vahît Akgun û Mahmut Manasî yê ke xeylê wext Zindanê Amedî de mendê derheqê ê rojan de qisey kerd.

Hemserekê DBPyî yê Rihayî û endamê Înîsîyatîfê 78îyan Vahît Akgunî va, “Ez 20ê Teşrîna Verêne 1980î de ameya girewtene. Ma çend rojî Riha de raştê îşkenceyan ameyê û înan ma erşawitê Amed. Ma ameyê mehkemakerdiş û înan ma erşawitê Zindanê Amedî. Ma raştê îşkenceyanê psikolojik û fizîkîyan ameyê. Ma hucreyanê yewkesinan de 9-19 kesî mendêne. Ma pay ra mendêne û bi dore eşkayêne rakewê.”

Rayberan moral dayêne ma

Akgunî dîyar kerd ke seba ke îradeyî bêrê şikitene her çî ameyêne kerdene û va, “Xoverdayîşê rayberanê Hereketê Azadîye Kurdan hêvî dayêne ma. Waştêne xoverdayîşê Kurdan çin bikerê. Cuya rayberan û têkilîyê înan tim moral û motivasyon dayêne ma. Înan vatêne bi fizîkî ma teslîm bibê zî ruhê ma teslîm nêbeno. No teslîmnêbîyayîş bi bingeyê xoverdayîşê pîlî û her ca ra bi vila.”

‘Kerdenê ewroyî yê 12ê Êlule vîyarnenê’

Akgunî dîyar kerd ke tecrîdo ke ewro Serekê PKKyî Abdullah Ocalanî rêbeno berhemê 12ê Êlule yo û va, “Ewro hiqûqêko cîya yeno ramitene. Ewro zî weçîniteyê nê komelî erzîyenê peye beran. Kerdenê ewroyî yê 12ê Êlule vîyarnenê. Ganî Kurdî û nasnameyê bîn ê bindestî bêrê têhet û nê faşîzmî binbifînê.”

‘Zindan bi qelaya xoverdayîşî’

Endamê Înîsîyatîfê 78îyan Mahmut Manasî dîyar kerd ke darbe seba ke hereketê azadîye bişikno ame kerdene û va, “Seba ke herteket bêro şikitene, înan Esat Oktayî erşawit Zindanê Amedî. Oktayî kerdenê ke teberê merdimîye kerdê û fikirîya ke bin o qeyde eşkeno xoverdayîşî bişikno. La bi saya xoverdayoxanê pîlan, ê nêşkayê serbikewê. Zindan bi qelaya xoverdayîşî. Xoverdayîşê ewroyî Zindanê Amedî de werişt payan ser. M abi hêza ê xoerdayîşî ewro xover danê. Ma do rojêke birasê serkewtişî.”