Serrgêra 43ine ya 12ê Êlule de xeylê bajaran de eşkerayîyê ameyê dayene

Darbeyê eskerî yê 12ê Êlule  ser ra 43 serrî vîyartê. Serrgêra darbeyi de xeylê bajaran de eşkerayîyê ameyê dayene.

Darbeyê 12ê Êlule ser ra 43 serrî vîyartê. Darbeyo eskerî, serrgêra xo 43ine de xeylê bajaran de bi çalakî û eşkerayîyan ame protestokerdene.

Hetê Komeleya 78îyan û ÎHDyî ra vernîya Zindanê Amedî yê 5 Noyinî de eşkerayîye ameye dayene. Parlamenterî û xeylê kesî bîyê beşdarê eşkerayîye.

‘Darbeyo faşîst’

Eşkerayîye ra dima Parlamenterê CHPyî Sezgîn Tanrikuluyî qisey kerd û va, “No zindan de xeylê îşkenceyî û zalimîyê giranî ameyê kerdene. Heta ke înan reyde têrîameyîşêk mebo, nê travmayî nêvîyarenê. Darbeyê 12ê Êlule mîyanê rêzila komutayî ya Hêzanê Çekdaran ê Tirkî ameyo kerdene û darbeyêko faşist bi. Ma do qetîyen zîhnîyeto darbekar ra hesab bipersê.”

Parlamenterê Partîya Çep a Keske Mehmet Kamaçî zî va, “Bingeyê pêro darbeyanê Tirkîya de meseleya Kurdan esta. Heta meseleya Kurdan çareser meba, na meseleya darbeyan çareser nêbena. Ma ewro sey kerdenanê darbeyî pratîkê qeyûman vînenê. Seba çareserkerdişê meseleya Kurdan û awankerdişê cuya demokratîke ganî têrîameyîşêk bibê.”

Hemserekê DBPyî yê Amedî Hafrettîn Altun o ke Zindanê Amedî de mendibi zî dîyar kerd ke ganî Zindanê Amedî bibo Muzeya Heqanê Merdiman.

Îstanbûl, Riha, Mersîn, Hetay, Dêrsim û xeylê bajaran de zî serrgêra 12ê Êlule de çalakîyî ameyê kerdene û eşkerayîyê ameyê dayene.

MERKEZÊ XEBERAN