Rojnamegerê girewteyî: Ma rêça heqîqetî de yê

• Rojnamegeranê girewteyan va, “Ma do timûtim rûmetê rojnamegerîye bipawê.”

Goreyê malûmatanê DFGyî, 87 rojnamegerî 10ê Çeleyî Roja Rojnamegeranê Xebatkaran hepisxane de vîyarnenê. Rojnamegeran ra Mudura Karanê Nuşteyî yê MAyî Dîren Yurtsevere, Bêrîvan Altane, Ceylan Şahînlî, Denîz Nazlim, Emrûllah Acar, Hakan Yalçin, Selman Guleryuz û muxabîrê JINNEWSî Habîbe Erene û Oznur Degere, derheqê 10ê Çeleyî de mesaj erşawit.

‘Ferqê ca û mekanî çin o’

Mesajî de ame vatiş ke, “Tirkîya hûmara rojnamegeranê girewteyan de doranê verênen de ya. Çapamenîya azade zî na rewşe ra para xo girewta. Çapaemenîya azade xeylê wextan raştê tedayan ameye la çirey rêça heqîqetî ra nêvejîyaye. Ma zî rojnameger ê û ma do rêça heqîqetî ra mevejîyê. Rojnamegeran rê ferqê ca û mekanî çin o. Ma ça benê bibê, ma do karê rojnamegerîye bikerê. Ma do timûtim rûmetê rojnamegerîye bipawê.”

Altan: Ma paştîdayîşî pîl bikerê

Hemserekê DFGyî Serdar Altan o ke Dîyarbekir de girewte yo keyeyê xo ser ra mesajêk erşawit. Altanî dîyar kerd ke 10ê Çeleyî sey roja xoverdayîşî ya û va, “Ma rêça heqîqetî de yê û seba ke ma karê xo mekerê îqtîdarî çi înan dest ra yeno kenê. Serranê 90an de xebatkarî kuçeyan de ameyenê qetilkerdiş. Înan ra netîce nêgerîya û dima bi destê mehkemayan çuwayê xo mojnenê. Cayê ma yê karî ameyê padayene. Dest nîya ekîpmananê ma ser. La ma çirey gamêk têpîya nêeşte.”

Altanî dîyar kerd ke 10ê Çeleyî bi 86 embazanê xo reyde hepisxane de vîyarnenê û va, “Ma girewte bibê zî, xoverdayîşê ma dewam keno. Ma zanê ke çi beno wa bibo, tayê nêverdenê qelema înan bêra şikitiş, hepisxane ra nêtersenê û nuşteyanê xo nusenê. No zî hêze dano xoverdayîşê ma û hêvîya ma pîl keno. Ma do xoverdayîşê xo pîl bikerê û 10ê Çeleyî bikerê roja pîrozkerdişî. Ez Roja Rojnamegeranê Xebatkaran a pêroyê rojnamegeran pîroz kena.”

MERKEZÊ XEBERAN