Rojnamegerîya warî ameye qedînayîş

• Rojnamegeran dîyar kerd ke, ê do timûtim heqîqetan birasnê şarî û vera tedayan ê do timûtim xo ver bidê.

Rojnamegeran 1962yî de seba ke vera patronan heqanê xo yê bingeyînan vistê xo dest, 10ê Çeleyî sey ‘Roja Rojmamegeranê Xebatkaran’ yeno pîrozkerdiş. La na serre rojnamegerî raştê tedayan, binçimgirewtişan, girewtişan û binpaykerdişan ameyê. Goreyê malûmatan, se ra 30ê rojnamegeran bêkar ê, 87 rojnamegerî karanê xo ver girewte yê û xeylê rojnamegeran rê zî dewayî abîyê.

Rojnamegerîya warî ameyê qedînayîş

Muxabîrê Ajansê Mezopotamayayî Mujdat Canî derheqê 10ê Çeleyî de va, “Vanê Roja Rojnamegeranê Xebatkaran la warî de, seha de rojnamegerî ke karê xo bikerê çin ê. Bitaybetî Kurdistan de bê xebatkaranê çapemenîya azade seha de kes çin o. Rojnamegerê ke îqtîdarî rê bîat kenê her çîyî sey şayîye ramojnenê. Se ra 90î yê çapemenîye kewto binê kontrole îqtîdarî. Pêro xeberî yenê servîskerdiş. Xeylê problemi estê la warî de seha de rojnamegerî zaf kêmî yê. Ê yê ke estê zî, hetê îqtîdarî ra sey ‘terorîst’ yenê namekerdiş û erzîyenê hepis. Ma 16ê hezîrane de dî. 16 embazê ma ameyê girewtene. Reyna 29ê Teşrîna Verêne de zî 9 embazê ma ameyê girewtene. Seba nar oje bêra pîrozkerdiş ganî emzamê ma yê girewteyî bêrê veradayîş.”

Xoverdayîşo pîl yeno dayene

Muxabîra JINNEWSî Rojda Aydine va, “Rojnamegerî seba ke bieşkê heqîqetan birasnê şarî raştê teda û şîdetî yenê. Heqîqetî hêverî hetê rojnamegeran ra yenê vînayene. Coka komelî de cayê çapemenîye zaf muhîm o. Çapamenîya azade çirey heqîqetan ra fek ranêverda. Embazê ma ameyê girewtene la ma reyna zî heqîqetan dima şonê. Wazenê raştî zulmat de bimana. Rojnamegerê cinîyî bitaybetî raştê hêrîşan yenê. Xeylê embazê ma ameyê girewtene. Ma do seba embazanê xo zî xoverdayîşê xo biramnê. Cayê rojnamegeran teber û war ê, peyê beran nîyo.”
Çapemenîya azade bîad nêkerd

Edîtora Xeberan a Rojnameyê Xwebûnî Medya Bale zî va, “10ê Çeleyî seba rojnamegeran muhîm o la seba rojnamegeranê Kurdan muhîm nîyo. Bi hende teda û şîdetî embazê ma ameyê girewtene. Mas ey rojnamegeranê Kurdan nêşkenê nar oje pîroz bikerê. Îqtîdar wazeno heqîqetan şarî ra binimno. Krîz esto, vera Kurdan şerêk esto. Wazeno înan mîyan kero. Seba ke çapemenîya azade seba komelî xo ver dano beno hedefe îqtîdarî. Kedkarê çapemenîya azade ameyê kiştiş û ewr zî yenê girewtene. La çapemenîya azade çirey bîad nêkerd. Nika zî rojnamegerî yenê girewtene, xeberî yenê astengkerdiş û astengîyê pîlî vejîyenê vernîya ma. La ma reyna zî xo ver danê û nê mîrasî dewam kenê.”

MA / DÎYARBEKIR