‘Seba ke ma Kurdî ma raştê şîdetî ameyê’

pêncşem 23 hezîranê 2022 - 09:58

  • Mehlaya Elbakî ya Xaşkanî de welatîyêk gêrîyabi binê çimî, eskeran guleyî teqnaybî û cinîyî darb bibî.

HAKAN YALÇIN / MA / WAN

Mehlaya Elbakî ya Xaşkanî de welatîyêk gêrîyabi binê çimî, eskeran guleyî teqnaybî û cinîyî darb bibî.

Elbakê Wanî de, mehlaya Xaşkanî de eskeran 20ê Hezîrane de eştibi keyeyê Atliyan ser. Mehmet Emîn Atli hetê eskeran ra gêrîya binê çimî. Înan bi qasê çend deqîqeyan guleyî teqnayê û cinîyî bi destê înan darb bîyê. Walîyê Wanî paştî da şîdetê eskeran. 

Paynikan ra kewte

Keynaya Mehmet Emîn Atliyî Ayten Atli vate, “Teber de vengêk ame, ez şîya teber mi dî xeylê eskerî estê. Mi va şima çira ameyê. Înan va ma ameyê keyeyê şima bigêrê. Mi va destûrê şima yê gêrayîşî esto û înan ez tan daya. Mi va ez emelîyat kerdî ya. Înan goş nêda mi ez tan daya û ez paynikan ra kewta. Ez hinî nêşkaya wirzî. Darban ver paştîya mi masaye.”

‘Ewlehîya ma ya ganî çin a’

Ayten Atli vate, “Bi qasê çend deqîqeyan înan guleyî teqnayê. Ma nêşkayê xo bidê daldeyêk. Seba ke ma Kurdî ma raştê şîdetî ameyê. Xora dîyar bi ke ê tena seba binçimgirewtişî nêameybî. Seke seba heyfî ameybî. Înan ez û dadîya mi xeylê dard kerdê. Tewr zêde zî Çawişo Uzman Mehmet K.yî ma darb kerdê. Tîya de bi eşkera nîjadperstîye esta. Eke nîya tehda bikerê, ma do bi mecbûrî bar bikerê. Ewlehîya ma ya ganî çin a. Ma zaf tersenê ke çîyêk bêro ma ser.”

Gazîya paştîdayîşî

Ayten Atli gazîya paştîdayîşî kerde û vate, “Bi serran ra nat ma ser o zulim kenê. Hêverî delîlê ma çin bi la nika esto. Ma fekê bere xo de darb bîyê. Eke seba Kurdbîyayîşê ma nîyo, çi yo? Ma edalet wazenê. Ganî her kes paştî bido ma û hetê ma de vindero.”
Erdî de darb bîyê

Cinîya Mehmet Emîn Atiyî Dîlber Atli vate, “Ez gineya erdî ro la înan ez erdî de darb kerda. înan da mêrdeyê mi ro, mi waşt ez meverdî û înan guleyî teqnayê. Hema zî çîpanê mi de herinda payanê înan esta. Psîkolojîyê domananê ma xeripîya. Ma raştê zulim û heqeretî ameyê. La qey wezîfeyê înan şarî rê zulimkerdiş o? Ma do heqê x ora mevîyarê. Ma wazenê nê zulimkarî hesabê kerdenanê xo bide.”

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.