Tarîxê Kurdan ra belgeyêk: Şewqa Sibê

Nûçeyên Çand/Huner

sêşem 10 gulanê 2022 - 18:05

  • Şewqa Sibê hetê Nûrî Hîzanîyî ra 1934î de nusîyayo. No kitabê hîkayeyan hetê rojnameger Îbrahîm Bûlakî ra ameyo hedrekerdiş û Weşanxaneyê Lîsî ra reyna çap bîyo.

Şewqa Sibê hetê Nûrî Hîzanîyî ra 1934î de nusîyayo. No kitabê hîkayeyan hetê rojnameger Îbrahîm Bûlakî ra ameyo hedrekerdiş û Weşanxaneyê Lîsî ra reyna çap bîyo.

Nuştoxo Ermenî Nûrî Hîzanîyî kitabê hîkayeyan ê Şewqa Sibêyî 1934î de nuşto. Nameyê nuştoxî yo raştekîn Hovakîm Margaryan o. Kitabê hîkayeyan ê Kurdkîyî de 8 hîkayeyî estê. Kitab nika bi hedrekerdişê Îbrahîm Bûlakî Weşanxaneyê Lîsî ra vejîyayo.

Sovyetan de berhemo edebîyo verên

Îbrahîm Bûlakî va, “No kitab edebîyatê modernî yê Kurdkî de kitabê hîkayeyî yo verên o. Nûrî Hîzanî 1896î de Bedlîs Hîzan de ameyo dinya. Keyeyê ey tertelelî de weş mendo û ê şîyê Êrîwan. Nûrî Hîzanîyî Êrîwan de derse daya domananê Kurdan. Nûrî Hîzanîyî hetêk ra mamostetî kerda hetêk ra zî materyalê perweredewî Ruskî ra açrnayê Kurdkî. Riya Teze de nuşteyan nuseno. Dima kibabê xo yê Şewqa Sibêyî nuseno. No kitab zaf nîno zanayene. Kitabanê Erebê Şemo û Wezîrê Nadirî ra serrêk verî vejîyayo. Sey kitabî, Kurdkî de kitabê hîkayeyî yo verên o.”

‘Xoverdayîşê Agirîyî tabûyêk bi’

Derheqê tedeyîya hîkayeyan de Îbrahîm Bûlak vano, “Sovyetan de hîna zêde rexneyê feodalîzmî ameyêne kerdene û edebîyat zî na rêçe ra şîyene. Nûrî Hîzanî zî hîkayeyê winasîyî nuştê la hîkayeyêka xo de behsê Xoverdayîşê Agirîyî keno. Hîkayeya ‘Rihan û Sila’yî de behsê Xoverdayîşê Agirîyî beno. Xoverdayîşê Agirîyî ser o qiseykerdiş demêko derg Sovyetan de tabûyêk bi. Seba ke Xoybûnî de Kurd û Ermenîyî pîya bî, îdareyê Sovyetan nêwaştêne behsê nê xoverdayîşî bibo. Nûrî Hîzanî kibabê xo yê dîyinî bi nameyê ‘Hub û Xebat’î 1962yî de vejeno. No kitabê şîîran o û par reyna Weşanxaneyê Lîsî ra çap bîyo. Hîzanî şîîrêka xo de behsê Elîşêr û Nûrî Dêrsimîyî keno. No zî seba ê wextan teferûatêko balkêş o.”

Vîrî ra şîyo

Bûlakî muhîmîya kitabî ser o va, “Wexto ke edebîyatê Kurdkî qisey beno, behsê nê kitabî nêbeno. Bado ke nuştoxê nifşa ey merdê bitemamî vîrî ra şîyo. Mi ser o cigêrayîşî kerdê la ez nêşkaya tarîxê mergê ey bimusî. Malûmato peyên yê serra 1966î yo. Nûrî Hîzanî bado ke teqawit beno, 70 serrîya ci de seba ke Kurdkî ser o kede daya Êrîwan de seba ey çalakîyêk virazîyaya.”

 

MA/AMED

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.