Tarîxê xoverdayîşî: Roja Kobanîyî

• Endamê Meclîsa Îdareyê Xoserî derheqê Roja Kobanîyî de qisey kerd û dîyar kerd ke hêrîşî yenê kerdene la awankerdişê sîstemê demokratîkî dewam keno.

MUJDAT CAN / MA / RIHA

Endamê Meclîsa Îdareyê Xoserî derheqê Roja Kobanîyî de qisey kerd û dîyar kerd ke hêrîşî yenê kerdene la awankerdişê sîstemê demokratîkî dewam keno.

DAÎŞ şerê Sûrîyeyî xo rê firsend dî û 2014î de hêrîşa Kobanîyî kerde. Xoverdayîşê Kobanîyî bi destpêkê binkewtişê DAÎŞî. 2015î de bi gazîya xeylê roşnvîr û nuştoxan ra 1ê Teşrîna Peyêne sey Roja Kobanîyî ameye îlankerdiş. Kobanî ame azadkerdiş la bajarê Rojavayî raştê hêrîşan ameyê. Dima Efrîn, Serêkanîyê û Girê Spî ameyê îşxalkerdiş. Vera nê hêrîşan 2yê Teşrîna Peyêne sey Roja Rojavayî ameye îlankerdiş. Hetkarê Hemsereka Meclîsa Îdareyê Xoserî Emîne Osê rewşa mintiqa ser o erjnayîşî kerdê.

Xoverdayîşê Kobanîyî

Emîne Osê va, “Xoverdayîşê Kobanîyî xoverdayîşanê bînan rê bi binge. Kobanî bi Qelaya Xoverdayîşî. DAÎŞ Kobanî de bi fîzîkî ame binvistene. Kobanî seba şaran bi halînê xoverdayîşî û bingeyê sîstemê demokratîkî.”

Hêrîşê Tirkîya

Osê va, “Îradeyo ke Bakur û Rojhelatê Sûrîyeyî de vejîya meydan, cesaret da pêro şaranê Sûrîyeyî. Îradeyê şaran ver komployî û hêrîşî ameyê puçkerdiş. Serkewtişî ra dima cuya ke tîya de ameye awankerdiş raştê hêrîşan ameye. Efrîn, Serêkanîyê û Girê Spî de bombayê fosforî ameyê gurînayene. Rejîm û Rusya zî paştî da Tirkîya. Hêzê mîyannetewî zî bêveng mendê. Tirkîya hêrîşê xo ramnayê û DAÎŞ waşt xo newe ra gande bikero. QSD zî vera nê tehtîdan xebatê xo ramnayê.”

Awankerdişê sîstemê demokratîkî

Dewamê qiseykerdişê xo de Emîne Osê va, “Hetê Îdareyê Xoserî ra mintiqa timûtim ameye pawitene. Projeyê Îdareyê Xoserî serkewt û Tirkîya ci ra nêrehet bîye. Tirkîya tersane xo ver hêrîşanê xo ramnena. Vera nê hêrîşanê Tirkîya pêro dinya bêveng a. Îdarekarî bi sûîqastan hedef gêrîyenê. Tirkîya bi polîtîkayanê leyşinan sucanê xo yê şerî ramnena.”

Awankerdiş dewam keno

Emîne Osê peynî de va, “Ma şerî ra dima rêxistinîya şarê xo esas girewt. Mekanîzmayê ma yê pawitişî ameyê xurtkerdene. 10 serrî ra nat no xoverdayîş dewam keno. Îradeyê şarî pêro hêzan ra hêzdar o. Nê xoverdayîşî ver DAÎŞ ame binvistiş. Îdareyo Xoser, bi şarê xo û îdareyê xo awankerdişê xo ramneno.”