Vural: Dîalogê mabênê kurdan eşkeno statu awan bikero

WELAT EKÎN / MA / AMED

Endamê Ronayoxê ÎHD û TÎHVî Mehmet Vuralî va, “Kurdî ganî xo mîyan de hiqûqê biratîye awan bikerê.”

Vera polîtîkayanê îmhakerdişî xoverdayîşê kurdan dewam keno. Seserra diyîne ya Peymanê Lozanî de Kurdî gazîye kenê ke ganî mabênê kurdan de yewîtîya neteweyî bêra awankerdene. 

Endamê Ronayoxê ÎHD û TÎHVî Mehmet Vuralî derheqê yewîtîya neteweyî de erjnayîşî kerdê. Ey dîyar kerd ke Lozanî ra dima kurdî nêşkayê bi nasnameyê xo bibê wayîrê heqanê xo.

Ganî bingeyê dîalogî bibo

Mehmet Vuralî va, “Welatê kurdan hetê 4 dewletan ra ame letekerdiş, kurdî nêşkayê yewîtîya xo awan bikerê û bi no qeyde zî qasê seserrêke kurdan vîndî kerd. Seba seserra ke ha ma vernî de ganî kurdî xo mîyan de pê bikerê. Ganî kurdî xo mîyan de bingeyê dîalogî ronê. Eke nîya bibo, hêzê ke vera kurdan ê do zeîf bibê û kurdî do birasê heqanê xo.”

Kurdî bêstatu nêbenê

Vuralî va, “Kurdî ganî şerê mabênê xo biteriknê. Eke nîya bikerê do bieşkê birasê statuyêk. Rayberî û sîyasetmedarî ganî na mesele de zaf baldar bê. Kurdî ganî xo mîyan de hiqûqê biratîye awan bikerê. Kurdî ganî xo mîyan de bibê yew ke muqtedîrî vera înan de zeîf bibê.”