Partîyê Kurdan: Ma ganî yewîtîya neteweyîye awan bikerê

pêncşem 21 îlonê 2023 - 10:02

Mujdat CAN – Bazîd EVREN / MA / AMED

Temsîlkaranê partîyanê Kurdan dîyar kerd ke ganî vera hêrişan yewîtîya neteweyîye bêra awankerdene.

Gewrîya Zîne de hêzanê PDKyî hêrişê mewzîyanê HPGyî kerdibî û şer qewimîyabi. Nê hêrişî ameyê şermezarkerdene. Hetê Serekê partîya PÎAyî Mehmet Kamaç, Serekê PSKyî Bayram Bozyel û Serekê Partîya Azadî Ayetullah Azadîyî ra rewşa mintiqa ameye erjnayene.

‘Ganî hêzê Kurdan bibê yew’

Mehmet Kamaçî va, “Kurdistan sey bedenêkî yo. Leteyêkî de çîyêk bibo zî netîce nîna girewtene. Ganî pêroyê bedenî pîya têbigêro. Hêzanê ke erdê Kurdan kolonîze kerdo wazenê mabênê Kurdan de îxtîlafan peyda bikerê. Eke nê safî mebê do hîna pîl bibê. Ganî Kurdî meseleyanê xo xo mîyan de çareser bikerê. Ganî firset medê kolonyalîstan. 100 serrî verî cû Kurdistan ame letekerdiş. Ganî Kurdê çer leteyî û dîasporayî stratejîk têbigêrê û yewîtîyêke awan bikerê. Ganî pêro partîyê Kurdan bibê yew û ma ganî yewîtîya xo awan bikerê.”

Ganî yewîtîya neteweyîye awan biba’

Serekê PSKyî Bayram Bozyelî va, “Tirkîya, Iraq û Îran hêrişê Kurdan kenê û wazenê destkewteyanê Kurdan dest ra bigerê. Tirkîya vera Başûrî serran ra nat hêrişanê xo ramnena. Ma vînenê ke mabênê hêzanê Kurdistanî de îxtîlafî estê. Ma hêvî kenê ke ê mabênê xo de nê meseleyan safî bikerê. Ma ewro Lozanî ser o nîqaşan kenê. Ma zanê ke 100 serrî verî cû, seba ke ma nêbîyê yew ma nêşkayê statuyêk bigerê. Ma nêwazenê no reyna tekrar bikero. Ma hêvî kenê ke wa nê meseleyi bi dîalogan safî bibê. Kurdî hinî Kurdê verênî nîyê. Ewro destkewteyê ma estê. Ma ganî polîtîk têbigêrê û meseleyanê xo çareser bikerê.”

‘Ganî Kurdî xo mîyan de şer mekerê’

Serekê Partîya Azadî Ayetullah Aşîtîyî va, “Dişmenê Kurdan wazenê Kurdî xo mîyan de şer bikerê. Ganî hêzê Kurdan mekewê tora înan. Ma ganî şerê birakûjîyî ra fek veradê. Çîyo tewr muhîm no yo. Ganî seba yewîtîya neteweyîye xebatî bêrê kerdene. Kurdî pêroyî zanê ke heta ke ma nêbê yew, ma nêşkenê bixelisîyê. Ganî pêroyê partîyê Kurdan pîya xetêka neteweyîye awan bikerê.”