Zeraq: Ma nêşkenê bi Tirkî qiseykerdiş asîmîlasyonê vera Kurdkî bivindarnê

Dr. Dilawer Zeraqî bale nate kêmanîyan ser o û dîyar kerd ke bi Tirkî qiseykerdiş verê asîmîlasyonî nîno girewtene.

Hetê Şubeyê Egîtîm-Senî yê Wanî, eywana konferansî yê KESKî de panele ziwanî viraşt. Sey qiseykerdoxî Dr. Dilawer Zeraq bi beşdarê panele ziwanî û derheqê rewşa Kurdkî de erjnayîşî kerdê.

‘Ma waştişê perwerdeyî xo vîr ra kerd’

Zeraqî dîyar kerd ke ziwan bingeyê cuye yo û va, “Çend rojan ra dima wendegehî abenê û do nîqaşê perwerdeyê ziwanê dayîke dest pêbikerê. Serra 2000î ra nat ma ziwanê xo ra kewtê dûrî. Hêverî hêvîyêke estibî û na şikîyaye. Sebebê ci yê cîya-cîyayî estê. Dewlete ziwanê ma kerd çîyêko sembolî. Ziwanê ma nika bîyo sey şuşeyêko ke ti ci ra awe şimenê û dima erzenê.”

‘Dewlete çend biwaza Kurdkî hende serbest a’

Zeraqî va, “Polîtîkayê ke vera polîtîkayanê dewlete yenê ramitene bes nîyê. Kesê ke wazenê xo çimê dewlete de şîrin bikerê seba înan Kurdkî muhîm nîya. Ma vanê dersa weçînitîye muhîm a la ma nêvanê ma çira wazenê. Bi destê dewlete kanalêk ame akerdene. Sîstemê dewlete mîyan de Kurdkî bî serbest. Dewlete nîya kerd ke a çend biwaza Kurdkî hende serbest a.”

‘Ma Kurdkî ra dûrî kewtê’

Zeraqî dîyar kerd ke dewlete bi rayîranê cîyayan Kurdkî ser o teda kena û va, “Ma ganî vera nê polîtîkayan rayanê neweyan peyda bikerê. Kesê ke ziwanî xo vîr ra kenê asîmîle benê. Ma hinî cuya xo ya rojane de Tirkî qisey kenê. Her kes behsê muhîmîya ziwanî keno la eşkerayîyêke de Kurdkî selam yeno dayene û Tirkî dewam kenê. Dima ti vajê ‘Kurdkî şîrin a, rengîn a’ yew vateyê xo çin o.”

‘Bi Tirkî qiseykerdiş verê asîmîlasyonî nîno girewtene’

Zeraqî dîyar kerd ke hinî derheqê ziwanî de erjnayîşî bîyê sloganîk û va, “Vanê Kurdkî şîrin a. Beqlewa zî şîrin a. No çîyêk îfade nêkeno. Ma vanê Kurdkî rûmetê ma ya la ma pênaseyê ‘rûmetî’ nêkenê. Ma Tirkî qiseykenê, nusenê û roja ma ya rojane Tirkî ya. Bin o qeyde ma nêşkenê asîmîlasyonî bivindarnê. 100 hebî kursî û sazîyî bêrê akerdene nêbeno. Ganî Kurdkî bikewa fikr û mezgan. Pî û mayî Kurdkî qisey nêkenê la wazenê domanê înan Kurdkî qisey bikerê. No mumkin nîyo. Pîlî bi kamcîn ziwanî qisey bikerê, domanî zî bi ê ziwanî pîl benê.”

MA / WAN