‘Polîtîkaya Kurdan çinhesibnayîşî sihetî de zî yena ramitene’

Hemserekê Şaxa SESî ya Amedî Şîyar Gultekîn û Hemserekê MED-DERî Remzî Azîzogluyî dîyar kerd ke Kurdî û ziwanê înan çin hesibîyenê.

Sîstemê sihetî yê e-Reçetemî rê 5 ziwanî ameybî îlawekerdiş û mabênê nê ziwanan de Kurdkî ca nêgirewte. Na rewşe bîye sebebe gerre û rexneyan. Hemserekê Şaxa SESÎ ya Amedî Şîyar Gultekînî û Hemserekê MED-DERî Remzî Azîzogluyî derheqê rewşe de erjnayîşî kerdê.

‘Ganî na şaşîye bêra rastkerdene’

Hemserekê Şaxa SESî ya Amedî Şîyar Gultekînî va, “Na polîtîka zî politikaya 100 serrî ra teber nîya. No welat de 25 mîlyon Kurdî estê û tewr kêmî nîmeyê înan keye û teber de Kurdkî qisey keno. Kurdî wazenê bi ziwanê xo qisey bikerê û ziwanê xo de tedawî bigerê. Polîtîkaya Kurdan çinhesibnayîşî yena ramitene. Ganî na polîtîka ra fek bêro veradayîş û ganî na şaşîye bêra rastkerdene. Ganî Kurdkî zî îlaweyê sîstemî biba.”

‘Kurdan çin hesibnenê’

Hemserekê MED-DERî Remzî Azîzogluyî zî va, “Kurdan nêşinasnenê û înan çin hesibnenê. Eke welatêko demokrat bibîyêne, ziwan û estbîyayîşê hemwelatanê xo rê hurmet kerdêne. Kurdkî ziwanêko dewlemend o la nêverdenê bêro gurînayîş. Dewlete, Kurdkî tena mîyanê ziwananê gandeyan de vînena. Fikrê înan eynî yo û çîyêk nêvurîyayo. TRT 6 zî, zaningehî zî wina yê. Ma na dewlete ra çîyêk nêpawenê. Ma şarê xo ra çîyêk pawenê ke ganî wayîrê ziwanê xo bivejîyê. Ziwan estbîyayîş o û ganî wayîrvejîyayîşî bêro pawitene.”

MA / AMED