Ziwannas Bakir: Ganî seba ziwanê dayîke xoverdayîşo bêemsal bêro dayene

Nûçeyên Çand/Huner

sêşem 10 Çileyê 2023 - 16:11

  • Mamosta û ziwannas Abburrahman Bakirî va, “Ganî komel organîze bibo, paweyê dewlete mevindo û xoverdayîşo bêemsal bido.”

Mamosta û ziwannas Abburrahman Bakir o ke Kurdî ser o xebatan keno, derheqê polîtîkayanê asîmîlasyonî û muhîmîya perwerdeyê ziwanê dayîke de erjnayîşî kerdê. Bakirî dîyar kerd ke, vera polîtîkayanê asîmîlasyonî xoverdayîşo komelkî bêro dayene.

Bakirî va, “Bi serran ra nat vera Kurdkî polîtîkayê asîmîlasyonî yenê ramitene. Ewro xeylê çîyî vurîyayê la reyna zî nê polîtîkayî yenê ramitene. Tirkîya seba ke bikewa Yewîya Ewrûpa, tayê vurînayîşî kerdê û kursan rê rayîr ame akerdene. Ma zî Tirkîya û Kurdistan de kursî akerdê. La dewlete ke dî komelî de hişmendîyêk awan beno, sazîyê Kurdkî ameyê padayene. Nika zî vera Kurdkî, kulturê Kurdan û şarê Kurdî hêrîşê nîjadperestî yenê kerdene.”

‘Dewlete nêdana, ganî ma bigerê’

Bakirî va, “Îqtîdar heqê perwerdeyê ziwanê dayîke nêdano. Seba perwerdeyê ziwanê dayîke ganî komel organîze bibo. Ganî xebatê dîplomatîkî bêrê kerdene. Ma ganî paweyê dewlete mevindê. Xora dewlete ma nêşinasnena. Kurdî ganî seba nasnameyê xo têbigêrê. Dewlete bi xo nêdana, ganî ma bigerê. Ganî komel xo hetê sîyasî, kulturî, edebî, ekonomî û tarîxî ra organîze bikero. Ganî tena sazîyêk ser ra nê xebatî mebê. Pêroyê hetan ra ganî xebatî bêrê kerdene. Çar leteyan reyde zî ganî têkilîyê ma bibê.”

‘Ganî keyeyê ma bibê wendegeh’

Bakirî dîyar kerd ke, bi Kurdkî nuştiş û qiseykerdişî de kêmanîyî estê û va, “Terera Kurdkî kêmî yena qiseykerdiş. Ganî şar her ca de Kurdkî qisey bikero. Ma ganî keyeyanê xo bikerê wendegeh. Hema ke ziwan û kulturê ma zaf zirar nêdîyo, ma ganî têbigerê û birasê armancê xo.”
Bakirî seba hişmendîye bandorê sîyasetî ser o zî erjnayîşî kerdê û va, “Ganî sîyasetmedarî na babete de bibê wayîrê berpirsîyayîye. Mavajê ganî îdarekarê HDPyî Kurdistan de xebatanê xo bi Kurdkî bikerê. No seba pêro sazîyan ganî wina bo. Çi heyf ke na babete de ma zaf wayîrê hişmendîye nîyê. Ganî hetê îdarekaran ra Kurdkî bêro qiseykerdiş. Wexto ke wina bo, ma eşkenê gamêkna aver de şorê. 

Muhîmîya perwerdeyê ziwanê dayîke

Bakirî peynî de va, “Ziwanêk bingeyê xo gramer, çekûyan û alfabe ra geno. Xeylê xebatî ameyê kerdene. Mîr Celadet Elî Bedirxanî mîyanê şertanê zehmetinan de berhemêko erjaye vet meydan. Ma ganî ewro nê berhemî aver de berê. Ziwanê Kurdkî heta ke mebo ziwanê perwerdeyî yo resmî, binê talukeyê çinbîyayîşî de yo. Ganî hem hetê sîyasî ra hem hetê dîplomasî ra xebatî bêrê kerdene.”

MA / DÎYARBEKIR

parvê bike

   

Yeni Özgür Politika

© Copyright 2024 Yeni Özgür Politika | Mafên belavkirinê parastî ne.