'Verê çareserîye pê tecrîdî yeno girewtene'

• Buroyê Huqûqî yê Asrinî ard ziwan ke blokê îqtîdarî vera dîyalogan, metodanê haştîyan û demokratîkan ê seba çareserîya meseleya kurdan o û vat êyê ke xîretanê çareserîye yê Ocalanî ra acîz ê, tecrîd kenê giran.

Rayberê Şarê Kurdî Abdullah Ocalanî Komploya Mîyanneteweyîye ya 15ê Sibata 1999î ra nata Zîndanê Îmraliyî de tepişte yo.

Buroyê Huqûqî yê Asrinî derheqê tecrîdî de cewab da persanê ANFyî.

Goreyê Buroyê Asrinî bingeyê 15ê Sibate verî ra virazîya. Dewlete wazena ke meseleya kurdan çareser nêba. Coka tecrîd dîyeno dewamkerdene. Îqtîdar seba naye verê cû Cemayê Gulenî reyde nika zî MHPyî reyde koalîsyon kerd.

Buroyê Huqûqî yê Asrinî pare kerd ke blokê îqtîdarî pê dîyalogan, metodanê haştîyan û demokratîkan vera çareserîya meseleya kurdan o û îfade kerd ke AKP seba ke îqtîdarê ci dewam bikero û zerrîya hemkaranê xo weş bikero verê xo da polîtîkayanê asayîşî

Buroyî vist vîrî ke 15ê Sibata 1999î ra nata key polîtîkayê asayîşî bêrê caardene, key meseleya kurdan bikewa teda tecrîdê vera Îmraliyî ame girankerdene. Goreyê buroyî êyê ke fikr û pêşnîyazanê Ocalanî ra acîz ê, tecrîd kenê giranêr. Êyê ke operasyonê leşkerî û şer wazenê, merdiman tepişnenê, wazenê vengê Ocalanî bêro birnayene.

Buroyê Huqûqî yê Asrinî seba têkoşînê vera tecrîdî hem Tirkîya de hem zî warê mîyanneteweyî de muracatan keno. Buroyî seba heqê pêvînayîşî, telefonî, mektuban zaf reyî muracat kerd û derheqê şertanê prosesê janî de zî seba ke tedbîrî bêrê girewtene muracatê Serdozgerîya Komare ya Bursa kerd. Buroyî derheqê mesele de 16ê nîsane de zî muracatê CPTyî kerd. Rewşa holêre de avûkatî waştişanê xo rî bi rî selahîyetdaranê CPTyî rê do biresnê.

Sibate de şewatê Îmraliyî ra dima keyeyê ci Ocalanî reyde pêvînayîş kerdbi, prosesê janî de zî 27ê nîsane de Ocalanî telefonî reyde keyeyê xo de qisey kerdbi. Buroyî nê pêro vistî vîrî û îfade kerd ke Îmrali de caardişê huqûqî bîyo 'rewşêka îstîsnayîye.' Têna wextê şewat, jan û rewşêka lezabezî de 'huqûq' yeno caardene.

Buroyê Huqûqî yê Asrinî beyan kerd ke seba haştîya komelî bêvengîya tecrîdê Îmraliyî xeylêk bitehluke ya û komel qetî do neçare bimano ke kerdişanê Îmraliyî reyde têrî bimano. Bureyî vat: ''Tirkîya dewleta huqûqî ra kewte dûr. Coka ma pabeyê ci yê ke tecrîdê Îmraliyî bêro wedaritene û rayaumûmîye vera rewşe nêrazîbîyayîşê xo yê demokratîkî bimojna. Pêro netîceyê ke sîstemê tecrîdî û bêhuqûqî û polîtîkayê nêçareserî ya meseleya kurdan -ekonomî zî tede- pêro komel eleqedar kenê.

ANF