3 cinazayî nêameyê şinasnayene

Goreyê malumatan 3 cinazayê HPGyîjan ê ke înan Bagok de cuya xo vîndî kerda nînê şinasnayene.

27ê Kanûne ra nata derûdorê Nisêbînî de 9 mintiqayan de qedexe est o û goreyê malumatan operasyonî dewam kenê. Vîzêrî 3 cinazayî wedarîyayê morgê Nêweşxaneyê Cigêrayîşî yê Mêrdînî û goreyê malumatan nê 3 kesî endamê HPGyî yê. Seba ke cinazayî bêrê teşhîskerdiş xebere dîyaya keyeyan.

Cinazayî nêameyî şinasnayene

Keyeyî seba teşhîskerdişî şîyê Mêrdîn la seba ke cinazayan xisar dîyo nêameyê şinasnayene. Ameyo dîyarkerdiş ke cinazayî ameyê vêşnayene û tayê weslê înan kêmî yê. Keyeyan seba tespîtê nasnameyan nimuneyê gonî da.

Şikê gurînayîşê kîmyewîyan

Keyeyan dîyar kerd ke rewşa cinazayan ver ê kewtê şike gurînayîşê kîmyewîyan. Înan dîyar kerd ke derheqê na rewşa cinazayan de malumat nêdîyayo înan.

Heto bîn ra Wezîrê Karanê Zereyî yê Tirkîya Alî Yerlîkaya hesabê xo de pare kerd û goreyê malumatanê ey Delîl Bal, Îslam Ozçay û Loqman Muhammed cuya xo vîndî kerda.

MA / MÊRDÎN