Cinazaya Elçîçeke qûtîyêke de dîyaye keyeyê ci

Cinazaya Menfîyat Elçîçek a ke 2018î de cuya xo vîndî kerde qûtîyêka kartone de dîyaye keyeyê ci.

Endamê YJA-STARî Menfîyat Elçîçeke (Axîn Seydo), 14ê Êlule 2018î de mintiqaya Kato Merînosî ya Colemêrgî de pêkewtişêk de cuya xo vîndî kerde. Mudirîyetê Emnîyetî yê Colemêrgî xebere daye keyeyê û keyeyê ci nimûneyê DNAyî da. Nimûneyê DNAyî ame dayene la reyna zî bê xebera keyeye ci cinazaya Elçîçeke Colemêrg de ameye definkerdiş.

Qûtîya kartone de ameye dayene

29ê Teşrîna Peyêne de Mudirîyetê Emnîyetî yê Colemêrgî xebere daye keyeyî ke cinazaya Eiçîçeke Sazîya Tib a Edlî ya Îstanbûlî de ya. Naye ser o, keyeyê aye şi Sazîya Tib a Edlî ya Îstanbûlî û cinazaya Elçîçeke qûtîyêka qartone de dîyaye înan.

Keyeyê aye cinazaya xo arde qezaya Hezexî ya Şirnexî. Cinazaya Elçîçeke, ewro bi beşdarîya keyeyê ci Mezelcayê Şêx Hesenî yê Hezexî de ablûkaya polîsan de ameye definkerdiş.

MA / ŞIRNEX