Esteyê yewna ciwanî zereyê qutîyêk de dîyayê keyeyê ci

Esteyê Yilmaz Uzunî yo ke 2020î de Sêrt de hêrişa hewayî de cuya xo vîndî kerdibî, 3 serrî cuwa pey zereyê qutîyêk de dîyayê keyeyê ci.

Endamê HPGyî Yilmaz Uzun(Tolhildan Tekman), tewrê 5 embazanê xo ya 2020î de sêrt de hêrişa hewayî de cuya xo vîndî kerdibî. Esteyê ci 3 serrî cuwa pey dîyayê keyeyê ci. 2020î de nimuneyê gonî ameyo dayene, netîce vejîya la xebere nêdîyaya keyeyê ci û goristanê bêwarîyan de ameyo definkerdiş. 

Îbrahîm Uzunî esteyê lajê teslîm girewtê va, “Lajê mi 2020î de cuya xo vîndî kerde. Ez o wext şîya Sêrt û mi nimûneyê gonî da. 2021î de netîceyî vejîyayê la înan xebere nêdaya ma. Ma badê ci waştişnameyêk nuşt û cinaza dîyaye ma.”

Pîyê ci esteyê lajê xo girewtê û ver bi Tatosî yê Erziromî kewt raye. Ameyo dîyarkerdiş ke hetê eskeran ra muxtar û melayî rê teda bîya. Eskeran muxtarî ra vato ti ganî meverdê ke camî de cinaza rê nimac bêro kerdene.

Cinazayê Arslan û Îpekî zî qutî de amebî dayene

Na reya verêne nîya ke cinaza zereyê qutîyêk de yena dayene. Cinazaya Hakan Arslan o ke Sûr de 2015î de cuya xo vîndî kerdibî, 7 serrî cuwa pey mîyanê tewreyêkî de dîyaybî pîyê ci Alî Riza Arslanî.

Agît Îpek o ke Dersîm de cuya xo vîndî kerdibî, cinazaya ci 2020î de bi qolîyêk bi PTTyî dadîya ci Halîse Aksoye rê amebî erşawitene. Halîse Aksoye, 2023î de Amed de gêrîyayê binê çimî û ameye girewtene.

YENÎ YAŞAM