‘8ê Adare roja xoverdayîşî ya’

Endama Koordînasyonê Kongra Starî Welîde Botî bi wesîleya 8ê Adare Roja Cinîyan ê Kedkaran a Dinya ANFyî rê qisey kerd.

Koordînasyonê Kongra Starî ra Welîde Botî derheqê 8ê Adare de tayê ercnayîşî kerdî û vat ke 8ê Adare roja mucadele û xoverdayîşî ya.
Welîde Botî wina vat: “Komîteya ma ya dîplomasî xebatê mûhîmî kerdî. Xeylêk înîsîyatîfî nayî ro ke sereyê înan de ‘Îşxal û Qirkerdişî rê nê’ û ‘Cinîyî Rojawanî Pawenî’ yenê. Heta nika ‘Cinîyî Rojawanî Pawenî’ 30 welatan de ame rêxistinkerdene. Reyna Kongra Star-Ewropa konferansê xo kerd.

Xeylêk welatan de cinîyan reyde pêvînayîşî ameyî kerdene. Hedefê ma yo verên o bî ke ma xo biresnê cinîyanê bînan û yewîya cinîyanê dinya, mucadeleyê kolektîfî de bimanê. Ma eşkenê vajê ke ma netîceyê muhîmî vistî dest. Gama ke Talîbanî Afganîstan fîna dest, qîrayîşê cinîyanê afganan resa ma. Ma waşt bibê vengê înan. Beno ke ma nêeşkayî sîstemî bişiknê la mucadele ame averberdene. Çi beno wa bibo ma her ca de vazdanê gazîya cinîyan ê ke tengayî de yê. Slogana ‘Jin Jiyan Azadî’ ewro seranserê dinya de vila bîya.”

Botî qiseykerdişê xo rê wina dewam kerd: “Ma hetê ekonomî, perwerde û ekolojî ra zî xebatê muhîmî kerdî. Hetê bînî ra seba ke ma bibê vengê cinîyan ê ke herêmanê îşxalkerdeyan de yê, ma tim plan û programî kerdî. Seba ke sucê ke dewleta tirke û cerganê ci vera cinîyan kerdî bêrê belgekerdene, ma xebatî rayra berdî û belgeyî resnayî dezgehanê eleqedaran. Reyna ma pê çalakîyanê xo kerd ke şîdet, tecawuz, remnayîş û qirkerdişê vera cinîyan ê nê herêman dinya rê bidê eşnawitene. Seba ke ma bi Şorişê Rojawanî komelî bikerê zanaye û paradîgmaya Rayber Apoyî biresnê komelê ma û dinya, mucadeleyê ma do bêro xurtkerdene. Azadîya fîzîkîye ya Rayber Apoyî yo ke mîmarê slogana  ‘Jin Jiyan Azadî’ yo, gureyê ma yo verên o. Rojawan de 8ê Adare tim bi coşî yeno pîrozkerdene la emser rîyê erdlerzê 6ê sibate ra ma programê xo bedilna. 8ê Adare roja mucadele û xoverdayîşî ya. Xora semedê cinîyanê herême her roje roja mucadele, her roje 8ê Adar a.”

MERKEZÊ XEBERAN