Emîne Şenyaşare rê zîyaretê 8ê Adare

Cinîyan, bi wesîleya 8ê Adare Emîne Şenyaşare zîyaret kerd.

Riha de Dayîkanê Haştîye, Platformê Cinîyan, Parlamentera HDPyî ya Rihayî Ayşe Surucu û Endamê Meclîsa Ciwanan a HDPyî, bi wesîleya 8ê Adare Roja Cinîyan a Dinya ameyê têhet û malûmatêk ame dayene. Dima cinîyî şîyê vernîya Edlîyaya Rihayî û înan Emîne Şenyaşare zîyaret kerd.

Rayberîya Dayîkanê Haştîye de cinîyî bi sloganan şîyê vernîya edlîya. Zîyaretî de Dayîka Haştîye Adalet Çaye qisey kerd û va, “Dayîka Emîne bi waştişê edaletî nobete de ya. La hema zî waştişê ci nêameyo ca. Ma Dayîkê Haştîye edalet û haştîye wazenê. Hinî wa dayîkî mebermê. Ma do heta peynî paştî bidê dayîka Emîne û ma do hetê aye de bê.”

Îqtîdar faîlan paweno

Emîne Şenyaşare cinîyan rê sipas kerd û dîyar kerd ke a seba her kesî edalet wazena. Emîne Şenyaşare va, “Hinî bes o. Wa edalet cayê xo bigero. Lajê mi çend serrî yo hepis de yo, wa hinî serbest bo. Însanî nêweşxane de nînê qetilkerdiş. Îqtîdar zî faîlan paweno.”

‘Wa edalet cayê xo bigero’

Endama Meclîsa Ciwanan a HDPyî Senem Erîşe zî va, “Heta ke waştişê edaletî biyero ca û qetilkarî hesab bidê ma do hetê dayîka Emîne de bê. Ma do xoverdayîşî aye rê wayîr bivejîyê û ma do xoverdayîşê aye pîl bikerê.”

MA / RIHA