Şingalî dişmenî rê cewabêko tewr pîl o

sêşem 28 tîrmehê 2020 - 08:50

  • Endama Konseya Hemserekîya Pêroyî ya KCKyî Sozdar Avesta  bi wesîleya serrgêra Qirkerdişê Şingalî qisey kerd û vat: ''Abigêrê erdê xo, dînê xo, bawerî û kulturê xo. Başûrî ra agêrayîşê Şingalî zaf manadar o. Kesê ke agêrenê zî wa xo rêxistin bikerê.''

3ê tebaxa 2014î de cerganê DAÎŞî hêrişê Şingalî kerd û bi hezaran êzidîyî qetil kerdî, doman û cinîyî remnayî. Qirkerdişî sey Fermanê 73. tarîx de cayê xo girewt.

Endama Konseya Hemserekîya Pêroyî ya KCKyî serrgêra Qirkerdişê Şingalî de ANFyî reyde qisey kerd. Sozdar Avesta destpêkê qiseykerdişê xo de pêro qurbanê qirkerdişî û şehîdê HPG, YJA-Starî, YPG-YPJyî yad kerdî û qirkerdiş şermezar kerd.

Qiseykerdişê Sozdar Avesta ra beşêk wina yo:
''Qirkerdişê 3ê tebaxe hetê Erdogan û cerganê ci ra ame kerdene. Înan bi hezaran doman, kokim, ciwan û cinîyî qetil kerdî. Cinî û domanî bazaran de sey esîrî rotî. Hema zî aqîbetê xeylêk cinî û domanan eşkera nêbi. Şexsê komelê êzidîyan, Êzidxanî de ame waştene ke erjê Kurdîstanî bêrê çinkerdene û komelê êzidîyan tarîxî ra bêro estaritene.

Xoverdayîşê ciwan û gerîlayan ê vera fermanê 73. zaf fîraz o. Ma 350 şehîdî dayî. Koyanê Şingalî de xeylêk kesan rixmê bêîmkanan zî destê înan ra çi ameyo kerd. 3ê tebaxe sena êzidîyan roja wayîrvejîyayîşî ya. Ciwanan Yewinê Pawitişê Şingalî awan kerdî. Fermanî ra dima DAÎŞ ame binkerdene û Şingal de felsefeya cuya azade ameye awankerdene. 

Ferman nika pê hêrişanê dewleta tirke dewam kneo. 2015î azadkerdişê Şingalî ra dima hêrişan reyna dest pêkerd. Dewleta tirke 5 reyî hêrişê Şingalî kerd. Ambargoyo ekonomîk zî dewam keno. 

Ganî şarê ma hînî abigêro Şingal. No seba dişmenî cewabêko tewr raşt û pîl o. Abigêrê erdê xo, dînê xo, bawerî û kulturê xo. Başûrî ra agêrayîşê Şingalî zaf manadar o. Kesê ke agêrenê zî wa xo rêxistin bikerê. Wa perwerde bigêrê û dezgehanê Şingal de bixebitê. Ganî Şingalêko xoser û demokratîk bêro awankerdene. Ganî pêro cinî û ciwanî nê rêxistinbîyayîşî de cayê xo bigêrê. Bi nê hawayî verê asîmîlasyon, qirkerdiş û fermanan do bêro girewtene.

Yewîya êzidîyan zaf girîng a. Mam Zekî Şingalî seba naye şewe û roje xebitîya û şehîd bi. Wa her kes mesuldarîya xo bîyaro ca. Wa şarê Şingalî rayîr nêdo îxanet û ajanîye. Meclîsê Xoserîya Demokratîke, Partîya Azadî û Demokrasîyî ya Êzidîxan, Têgêrayîşê Azadîya Cinîya ê Êzidîxanî, Yewinê Ciwanan ê Êzidîxanî hêzê ma yê meşrû yê. Wa şarê ma înan ra ber hêzêk sey îradeyê xo qebul nêkero.

Eke Hukmatê Iraqî wazeno ke êzidîyî ey efû bikero ganî vera hêrişanê dewleta tirke yê vera Şingalî tewirêk bimojno.

Hukmatê Başûrî ferman de êzidîyî têna verdayî, ê nêpawitî, mesuldarîya xo nêarde ca. Sûcê pîlî kerdî. Ganî nika xo bido efûkerdene. Coka ganî Hukmatê Başûrî Êzidîxanêkê azadî asteng nêkero. Ganî ê bizanê ke Şingal parçeyêkê Kurdîstanî yo. Wa her hêrişî de nêvajê 'Hêriş vera kurdan nê PKK ame kerdene.' No tewirêko raşt nîyo.

Têgêrayîşê ma xo Şingalî ra ant. Çunke şingalijî hînî eşkîyayêne xo îdare bikerê. La şingalijî tim dormeyê fikranê Rayber Apoyî de kom bîyî û xo rêxistin kerd. Ma pê emr û fermanê Rayber Apoyî têgêrenê. 

Reyna yenê waştene ke pê cerganê DAÎŞî qirkerdişî bêrê kerdene. Tewr peyên înan hêrişê Mexmûr û Şingalî kerd. Seba çalakîyanê vera nê hêrişan ez şarê ma yê Ewropa rê selma kena. La ganî çalakîyî înan dewam bikerê. Efrîn de her roje bi desan kesî qetil benê û yenê remnayene. 

Ganî statuyê Şingalî bêro naskerdene û kesê ke Qirkerdişê Şingalî de rolê ci esto, bêrê hukmkerdene.

Ez venga êzidîyan dana ke wa wayîrê erjanê ke pê gonîya şehîdan ameyî girewtene, bivejîyê. Roje roja yewîye ya. Ganî êzidîyî her wextî ra zêdêr têkoşîn de ca bigêrê. Ez pê na wesîle şexsê Mam Zekî Şengalî, Zerdeşt, Êzdîn, Hamît, Cîlo, Berîvan, Berxwedan, Dilgeş, Vînara, Armanca ve Jînda de pêro şehîdan reyna yad kena.Ma sozê xo dibare kenê ke ma do Êzidîxanê xoser û demokratîkî awan bikerê.''

ANF

parvê bike

   

Yeni Özgür Politika

© Copyright 2020 Yeni Özgür Politika | Mafên belavkirinê parastî ne.