Akin: Ganî vera tecrîdî hiqûq bêro pawitene

Hemverfekê Partîya Çep a Keske Îbrahîm Akinî dîyar kerd ke tecrîd vera merdimîye sûcêk o û ganî vera tecrîdî hiqûq bêro pawitene.

Hetê HDP û Partîya Çep a Keske yê Izmîrî ra derheqê prosesê newe ra awanbîyayîşî de konferansêk ame viraştene. Hemverfekê Partîya Çep a Keske Îbrahîm Akin û parlamentere Burcugul Çubuke û xeylê kesî bîyê beşdarê konferansî.

‘Ma do pêro pîya xo ver bidê’

Qiseykerdişê akerdişî hetê endamê rayraberdişî yê HDPyî Elîf Bulute ra ame kerdene. Bulute dîyar kerd ke no proses de kombîyayîşî û konferansî bîyê û bi netîceyanê înan do xerîteyê rayraşîyayîşî bêrê dîyarkerdene.  Aye dîyar kerd ke do pêro pîya xoverdayîş bêro kerdene.

‘Tecrîd pêro Tirkîya ra vila bi’

Hemverfekê partîya Çep a Keske Îbrahîm Akinî bale ante tecrîdî ser û va, “Tecrîd, Birêz Ocalanî ser ra pêro Tirkîya ra vila bîyo. Tecrîd, vera merdimîye sûcêk o. Vera nê sûcî ma ganî xoverdayîşê xo xurt bikerê. Ganî kam beno, çi beno wa bibo vera tecrîdî hiqûqî bipawo. Ma ganî timûtim heq û azadîyan bipawê.”

MA / IZMÎR