Amed de ‘Akademîya Heqanê Domanan a Helîn Hasret Şene’ ameye akerdene

Amed de seba ke binpaykerdişê heqê domanan ser o cigêrayîşî bibê, ‘Akademîya Heqanê Domanan a Helîn Hasret Şene’ ameye akerdene.

Komeleya Hêvîyanê Rengarengan (RUMUD) û Komeleya Psîkologan a Mezopotamya (DER-MEZ), seba ke binpaykerdişê heqê domanan bêrê teqîbkerdiş , raporkerdiş û derheqê domanan de xebatî bibê ‘Akademîya Heqanê Domanan a Helîn Hasret Şene’ akerde. Akademîye mîyanê Sûrî de ameye akerdene û xeylê kesî bêşdarê akerdişê ci bîyê.

Endamê Îdareyê RUMUDî Zeynep Demîr Akçere akerdişî de qisey kerd û dîyar kerd ke domanê Kurdî raştê binpaykerdişê têduştîye yenê. Akçere va, “Domanê Kurdî hetê xo îfadekerdişî ra û heqê kaykerdişî ra raştê binpaykerdişan yenê. Domanî heqanê xo yê bingeyînan ra mehrûm manenê. Warê kayê domanan de qereqolî yenê viraştene.”

Dayîka Şene: Helîne dejê pêro dayîkan a

Helîn Hasret Şene, wextê şerê bajaran de ameye qetilkerdene. Dayîka aye Nazîme Şene dîyar kerd ke Kurdistan de heqê domanan yenê binpaykerdene û va, “Helîne verê berê ma de kaykerdêne û ameye qetilkerdene. Helîne bîye vengê pêro domanan ke ameyê qetilkerdene û bîye dejê pêro dayîkan.”

Qiseykerdişan ra dima akademî ameye akerdene.

MA / AMED