‘Tirkîya heqê cuye yê domanan destê înan ra girewt’
duşem 23 Çiriyê 2023 - 15:53
MA / Ceylan ŞAHÎNLÎ
Hêrişanê Tirkîya de 4 domanî ameyê qetilkerdiş û 10 domanan zî weslê xo vîndî kerdê.
Hêrişê Tirkîya yê ke 4ê Teşrîna Verêne ra nat Bakur û Rojhelatê Sûrîyeyî rê benê dewam kenê. Hêrişan de 4 domanî merde. Pawitoxanê heqê domanan dîyar kerd ke nê hêrişan de muqaveleyî yenê binpaykerdiş û heqê cuye yê domanan destê înan ra yeno girrewtiş.
4 domanî ameyê qetilkerdiş
Endama Hereketê Nûdemî ya ke derheqê heqanê domanan de xebatan kena Dayvan Mahmoude dîyar kerd ke 4 domanî ameyê qetilkerdiş, 10 domanî bîyê astengdar û va, “Hêrişî pêro kantonan rê bîyê. Hêrişêka Dirbêsiyê de domana bi nameyê Farah Adnan Al-Khaîre her di linganê xo ra bîye. Nêweşxaneyan rê zî hêrişî yenê kerdene. Bêîmkanîyan ver nêweşî û birîndarî nêşkenê tedawî bibê. Domanî nêşkenê şorê wendegeh û perwerde ra mehrûm manenê. Tirkîya heqê cuye yê domanan destê înan ra girewt. Nê hêrişî vernîyê çimanê dinya de benê la kes vengê xo nêkeno. Ma vînenê ke ê muqaveleyî tena qaxidî ser o nuşteyê.”
Merdimî bêawe mendê
Endama Merkezê Pawitişê Heqanê Cinîyan û Cigêrayîşî Mizgîn Hessene va, “Hêrişan de îstasyonê ceyranî û sotemenîyî hedef gêrîyayê. Merdimî bêawe û bêsotemenî mendê û na rewşe ver xeylê kesî nêşkayê karê xo bikerê. Keyeyî bêawe mendê. Bêawîye ver domanan de nêweşîya roqîleyan peyda bîya.”
‘Sûcê merdimîye yeno kerdene’
Hessene derheqê rewşa domanan de qisey kerd û va, “Domanî şew û roj binê stresî de yê. Çunke timûtim vengê bombayan û teqayîşan yeno. Muqaveleyê Heqanê Domanan ê Mîyanneteweyî de zî nuseno: Ganî domanî binê şertanê sihetinan de, derûdorêkî sihetinî de cuya xo biramnê. Heqê cuye yê domanan estê. La Bakur û Rojhelatê Sûrîyeyî de no heqo bingeyî destê domanan ra yeno girewtene. Filistîn de sûcê şerî yê zaf pîlî yenê kerdene. La eynî çîyî Rojava de zî benê û înan rê kes vengê xo nêkeno. No zî dirîyîya sîyasetê înan ramojneno.”