ÎSÎG: Wextê AKPyî de 888 domanan cuya xo vîndî kerde

ÎSÎGî bi wesîleya  Roja Xoverdayîşê yê Vera Karkerîya Domanan raporêk hedre kerd û dîyar kerd ke wextê AKPyî de 888 domanan cuya xo vîndî kerde.

Meclîsa Ewleyîya Karî û Sihetê Kargeran(ÎSÎG), 12ê Hezîrane Roja Xoverdayîşî yê Vera Karkerîya Domanan de raporêk eşkera kerd.

Raporî de ame dîyarkerdiş ke wextê AKPyî de 888 domananê karkeran cuya xo vîndî kerde. Ame dîyarkerdiş ke ganî domanî biwanê û kaybikerê la bi cînayetanê karî cuya xo vîndî kenê. Reyna ame vatiş ke, “Polîtîkayanê AKPyî ver her roje hûmara karkeranê domanan zêdîyena. Heto bîn ra zî wina têgêrenê ke seke karkerîya domanan çin a û wazenê na mesele mîyan bikerê.”

ÎSÎGî raporê xo de dîyar kerd ke ganî karkerîya domanan bêra qedexekerdiş û seba vernîgirewtişî cezayê pîlî bêrê dayene.

YENÎ YAŞAM