Amedijan rê gazîye: Bibê muşahîd, îradeyê xo bipawê

• Rêxistinanê Partîya Çep a Keske û HDPyî yê Amedî gazîye kerde ke wa şar bi zerrîwazî bibo muşahîd.

Xebatê weçînayîşî bêmabên dewam kenê. Partîya Çep a Keske do reya verêne bikewa weçînayîş. Wezîfedarê sindoqan ê Partîya Çep Keske çin ê, coka muşahîdî do bêrê wezîfekerdiş.

Hetê Hemverfeka Partîya Çep a Keske ya Amedî Pinar Tekîn û Hemserekê HDPyî yê Amedî Zeyyat Zeylanî ra seba ke bibê muşahîd ciwanan rê gazîye ameye kerdene.

Ma sindoqanê xo terk nêkenê

Tekîne va, “Ma sey Partîya Çep a Keske reya verêne kewenê weçînayîş. Wezîfedarê ma yê sindoqan çin ê. Ma weçînayîşanê verênan ra zî zanê ke ewleyîya sindiqan binê talukeyî de ya. Ma şarê xo rê gazîye kenê. Wa kes sindoqanê xo terk mekero. Her kes eşkeno şoro buroyanê weçînayîşî û bi zerrîwazî bibo muşahîd. Ganî muşahîdî tewr erey 06.30 de şorê sindoqan ser û heta ke sindoqî abibê ganî sindoqan terk mekerê.”

Destûr medê

Ceylanî zî va, “No weçînayîş seba ma zaf muhîm o û şarê ma zî na yewe zano. Ganî şarê ma, çi beno wa bibo wayîrê raya xo û sindoqa xo bivejîyo. Ma ciwanan rê gazîye kenê ke wa bibê muşahîd û wayîrê sindoqan bivejîyê. Na meseleya muşahîdîye seba ma zaf muhîm a. Serê sibayî ra heta şan ma ganî wayîrê sindoqan bivejîyê. Ma ganî wayîr vejîyê ke wa dizdî sindoqanê ma û îradeyê ma metirawnê.”

YENÎ YAŞAM / AMED