Hedef gêrîyayîşê Şêx Seîdî ame protestokerdene

Amed de hetê Platformê Ked û Demokrasîyê Amedî ra hedef gêrîyayîşê Şêx Seîdî ame protestokerdene. 

Platformê Ked û Demokrasîyî yê Amedî, hedef gêrîyayîşê Şêx Seîdî protesto kerd. Hetê BDPyî ra 2011î de nameyê Şêx Seîdî dîyabî bulvarêk û rojanê peyênan de na mesela ser o Şêx Seîdî re heqeretî amebî kerdene. Endamê platformî Meydanê Şêx Seîdî de ameyê têhet û eşkerayîye ameye kerdene. Hemserekê DTKyî Berdan Ozturk, temsîlkarê DBP û DEM Partîye zî bîyê beşdarê eşkerayîye.

‘Veteyê herişkarî nînê qebulkerdene’

Sereka Odaya Tabîban a Amedî Elîf Turane dîyar kerd ke şexsê Şêx Seîdî de erjane Kurdan rê heqeretî yenê kerdene û va, “Şêx Seîd û embazê ci xoverdayîşê heqanê xo dayo û hetê muqtedîranê ê wextî ra ameyê dardekerdene. Hema zî cayê mezela ci nîno zanîtene û Şêx Seîd sey Seyîd Riza û Nurî Dêrsîmî erjanê nê şarî ra yo. Seba ke nameyê ey dîyayo bulvarêk hetê nîjadperesestan û şovenîstan ra raştê heqaretan ameyo û nê hêrîşî nînê qebulkerdene.”

‘Qerar hete Osman Baydemîrî ra ame dayene’

Ame dîyarkerdiş ke weçînayîş beno nêzdî û tayî wazenê erjanê Kurdan qey rantê xo bîgurîne. Ame vîrardene ke nameyê Şêx Seîdî wextê Osman Baydemîrî de dîyayo bulvarî û ame vatene ke, “Qerar hete hemserekanê BDPyî ra ameyo dayene û derheqê înan de dewa ameya akerdene. Îqtîdar polîtîkaya dewlete ya se serrî ramneno û cayê mezela Şêx Seîdî sey sîrê dewlete nimneno. Qeyûm û derûdorê ci zî wazenê na mesele ser ra ranto sîyasî bîfîne xo dest.”

‘Ma do wayîrê erjanê Kurdan bîvejîyê’

Turane dîyar kerd ke ganî her kes wayîrê erjanê Kurdan bivejîyo û va, “Vera nê zîhnîyetanê şovenîstan ma ganî wayîre haştîye bivîjîye û seba ney zî ganî her kes hedê xo bizano û hesasîyet û erjanê şarî rê hurmet ramojno.”

MA / AMED