Bayindir: Eke şima çareserîye wazenê beranê Îmraliyî akerê

Hemserekê Pêroyî yê DBPyî Keskîn Bayindirî kongreya Sêrtî de qisey kerd û va, “Eke şima wazenê meseleya Kurdan çareser bikerê beranê Îmraliyî akerê.”

Rêxistinê Sêrtî yê DBPyî, kongreya xo ya 1ine bi beşdarîya Hemserekê Pêroyî yê DBPyî Keskîn Bayindirî viraşte. Xeylê kesî bîyê beşdarê kongre û kongre bi payravindertişê hurmetî dest pêkerde. 

Parlamentera Partîya Çep a Keske ya Sêrtî Sabahat Erdogan Saritaşe bale ante hêrişan ser o û va, “Dewlete, çar leteyê Kurdistanî de hêrişê şarê Kurdî kena û wazena yewîtîya şarê Kurdî birijna. Ma do wayîrê mîrasê xoverdayîşî bivejîyê û vera nê hêrişan xo ver bidê.”

Bayindir: Ma ganî xoverdayîşê xo pîl bikerê

Dima Hemserekê Pêroyî yê DBPyî Keskîn Bayindirî qisey kerd û verê qiseykerdişê xo ey serrgêra 31ine ya qetilbîyayîşê ci de Apê Mûsa yad kerd. Bayindirî va, “Ma prosese newe ra awanbîyayîşî de xeylê kombîyayîşê şarî viraştê. Kombîyayîşan de şarî zadîya Birêz Ocalanî waştêne. Ma ganî naye bivînê û goreyê na rastîye xo ver bidê. Bi xoverdayîşê şarê Kurdî do Birêz Ocalan biraso azadîya xo. Ma prosesêkî tarîxî ra vîyarenê. Dewlete wazena ma erdê xo ra û xozaya xo ra bar bikerê. Ma ganî vera nê sîstemî xoverdayîşê xo pîl bikerê.”

‘Wa berê Îmraliyî bêrê akerdene’

Bayindirî va, “Erdogan behsê qanûnê bingeyî yê neweyî keno. Reyna behsê ‘Tek milet, tek welat’î keno. No qanûno bingeyî yo senîn o? Çîyo ke înkarî ser ra yeno viraştene ma qebûl nêkenê. Tek armancê înan dişmenetîya vera Kurdan a. Eke wazenê meseleya Kurdan çareser bikerê wa beranê Îmraliyî akerê. Kurdî 50 serrî yo vera nê sîstemî xo ver danê û haştîye wazenê. Heta ke ma heqanê xo bigerê, ma do vera nê sîstemî xoverdayîşê xo biramnê.”

Bayindirî peynî de va, “Ma ganî wayîrê erjanê xo bivejîyê. Endamê KNKyî Denîz û endamê YNKyî ameyê qetilkerdiş. Kurdî her ca de yenê qetilkerdiş. Ma do wayîrê xatira û xoverdayîşê înan bivejîyê.”

MA / SÊRT