Bozan: Heta Abdullah Ocalan azad nêbo şarê ma azad nêbeno

Parlamenterê HEDEPî Elî Bozan Edene de çalakîyêke de qisey kerd û va, “Heta Rayberê Şarê Kurdî azad nêbo şarê ma azad nêbeno. Ma tecrîdî yan şiknenê yan şiknenê.”

AATUHAYDERî, qezaya Seyhanî ya Edeneyî de çalakîyeke viraşte. Xeylê îdarekarê DBP, HDP û HEDEPî, parlamentere HEDEPî yê Mersînî Elî Bozan û xeylê kesî bîyê beşdarê çalakîye. Pankartê sey ‘Birêz Ocalanî rê azadî, meseleye Kurdan rê çareserîya demokratîke’, ‘Wa tecrîdê Birêz Ocalanî bêro wedartene’ û ‘Wa înfazî meyerê veşnayene û girewteyê nêweşî bêrê vedadayene’ ameyê dardekerdene.

‘Ma do bi xoverdayîşî serbikewê’

Çalakîye de Hemserekê HDPyî yê Edeneyî Mehmet Karakişî qisey kerd û dîyar kerd ke sîstem bi îmhakerdiş û înkarî estbîyayîşê xo ramneno û dîyar kerd ke bi xoverdayîşî do serbikewê. Vilakerdoxê rojnameyê Azadîya Welatî Kadîr Bagdû, 14ê Teşrîna Verêne 2014î de Edene Şakîrpaşa de hetê DAÎŞijan ra amebi qetilkerdene. Çalakîye de xanima ey Semra Bağdûye qisey kerd û va, “Heta rayberê ma azad nêbo ma nêşkenê azad bibê.”

‘Ma azadîya Ocalanî wazenê’

Çalakîye de tewr peynî Parlamenterê HEDEPî yê Mersînî Elî Bozanî qisey kerd û va, “Heta Birêz Ocalan azad nêbo ma nêvindenê, ma do xoverdayîşê xo biramnê. Heta embazê ma yê girewteyî azad nêbê ma do nêvinderê û xoverdayîşê xo biramnê. 24 serrî yo Îmrali de tecrîdêk yeno ramitene. Partîya ma 3 aşmî yo çalakîyan kena. Nê çalakîyî tena seba wedartişê tecrîdî nîyê, seba azadîya Birêz Ocalanî yê. Goreyê qanûnan no sûc nîyo. Kes n3eşkeno vajo no sûc o. Şima zî eşkenê her ca de azadîya Birêz Ocalanî biwazê. Ma zî sozêk danê şarê xo; ma do Meclîs de bi nameyê şarê xo azadîya Birêz Ocalanî biwazê. Heta Rayberê Şarê Kurdî azad nêbo şarê ma azad nêbeno. Ma do tecrîdî yan bişiknê yan bişiknê.”

MA / EDENE