Çalakîyê Hefteyê Kulturî yê Kurdistanî dest pêkenê

Hefteyê Kulturî yê Kurdistanî do mabênê 24-27ê Tebaxe de hetê Bruksel NAV-BELî ra bêrê organîzekerdene.

Paytextê Belçîka Brukselî de Hefteyê Kulturî yê Kurdistanî, reya hewtine do hetê Enstîtuya Kurdî û NAV-BELî ra bêro organîzekerdene. Çalakîyî do mabênê 24-27ê Tebaxe de bêrê kerdene. Sazîyê Asûrî, Ermenî, Keldanî û Êzidîyan zî mîyanê organîzasyonî de yê. Çalakîyan de do kulturê Kurdan bidîyo şinasnayene û waştişê înan ê neteweyî bêrê îfaddekerdiş. Sewbîna do fîlmê Kurdkî zî do bidîyê temaşekerdene.

Dîaspora de xebatê kulturelî

Vilaweka xebate de ame dîyarkerdiş ke zengînîyê Kurdistanî bitemamî nînê zanayene û ame vatiş ke, “Hêverî Kurdî û dima Asûrî, Ermenî, Ereb û Tirkî Kurdistan de wayîrê çîyanê kulturîyan ê. Seba ke dewleta Kurdan çin a, hetê xeylê dewletan û şaran ra dest nînayo çîyanê înan ê kulturîyan ser. Kurdistan, timûtim raştê polîtîkayanê îmhakerdişî ameyo. Serranê peyênan de şarê qedîmî yê Kurdistanî seba ke kulturê xo bişinasnî û înan bidê şinasnayîş xebatan kenê. Nê xebatî zî dîaspora de rolêko pîl kay kenê.”

Meydanê Îspanyayî de Dewa Kurdan

Dewamê vilaweke de ame vatiş ke, “Sey serranê verênan, ma do Meydanê Îspanyayî yê Brukselî de Dewa Kurdan awan bikerê. Reyna ma do seba cil û berganê Kurdan defîleyêk virazê. Rojanê bînan de zî do xeylê cayan de konserî, tîyatroyî, semînerî û xeylê çalakîyê bînî do bibê. Emser do seba domanan zî çalakîyî bêrê kerdene. Ma wazenê wa ciwanan mîyan de têkilîyî xurt bibê. Ma do kulturê welatê xo bidê şinasnayene.”

MERKEZÊ XEBERAN