‘Cezayê dîsîplînî bêhiqûqî yê’

çarşem 27 tîrmehê 2022 - 17:08

  • Işik: Cezayê dîsîplînê ke dîyenê Birêz Ocalanî bêhiqûqî yê. Vera tecrîdî do xoverdayîşê ma yo hiqûqî dewam bikero.

Endama OHDyî ya Wanî awiqate Mehtap Işik va, “Cezayê dîsîplînê ke dîyenê Birêz Ocalanî bêhiqûqî yê. Vera tecrîdî do xoverdayîşê ma yo hiqûqî dewam bikero.”

Kampayaya îmzayan a ke seba şikitişê tecrîdê Abdullah Ocalanî hetê OHD(Komeleya Hiqûqnasan a Azadîye)yî ra ameybî dest pêkerdiş hîna zî yena ramitene. Seba ke tecrîd bêro wedartiş heta nika 775 awiqatan îmzayî eştê. Nê îmzakaran ra yew zî endamanê OHDyî ya Wanî ra awiqate Mehtap Işik a.

Awiqate Mehtap Işik va, “Hiqûqo mîyanneteweyî de cayê tecrîdî çin o. verî cû tecrîd hiqûqê xeylê dewletan de estibi la dima sey îxlalê heqanê merdiman ame dîyayene û hetê xetlê dewletan ra wedarîya. Tecrîdo ke verî cû Nelon Mandela û Antonio Gramsciyî ser de amebi ramitene, ewro Tirkîya de Abdullah Ocalanî ser de yeno ramitene. Na rewşe ne hiqûqî ya ne zî însanî ya. Îmrali de tecrîdêko giran yeno ramitene. Raşta zî ma nêzanê uca de çi qewimîyeno. Coka ma kampanyaya îmzayan da dest pêkerdiş.”

Heta Êlule wext dîya Tirkîya

Mehtap Işik va, “Hepisxaneyan ra her roje xeberê îşkenceyan û îxlalan yenê. Îşkence tena fîzîkî nîyo, îzolasyon zî îşkence yo. Mehkemaya Heqanê Merdiman a Ewrûpayî 18ê Adare 2014î de qerar da ke Tirkîya îxlalan kena la Tirkîya nê qerarî ca nêard. Awiqatanê Ocalanî naye ser o muraceatê Konseya Ewrûpayî kerd. Konseya Ewrûpayî zî va ganî Tirkîya tecrîdî wedaro û heta Êlule wext da Tirkîya. Nika zî wazenê tecrîdî bi cezayanê dîsiplînî pîne bikerê. Nê cezayî bêhiqûqî yê. Xeberê awiqatan nê cezayan ra çin a. Hiqûqo ke Îmrali de yeno ramitene hiqûqêko taybet o coka îtîrazî zî nînê qebulkerdiş. Qerarî ke yenê dayene hiqûqî ra dûrî yê û sîyasî yê.”

Xoverdayîşo hiqûqî do dewam bikero

Awiqate Mehtap Işik peynî de va, “Derheqê tecrîdî de hetê CPT(Komîteya Verê Îşkenceyî Girewtişî) û dezgeyanê mîyanneteweyîyan ra raporî ameyê hedrekerdiş. Çi heyf ke hema çîyêk nêameyo kerdiş. Na rewşe samîmîyetê nê dezgeyan mojnena ra û zirar dana heqperestîya înan. Ganî tecrîd cade bêro wedartiş. Seba ke tecrîd wedarîyo, xoverdayîşê ma yo hiqûqî do dewam bikero.”

MA / WAN 

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.