Çiya Kurd: Hêrîşê Tirkîya DAÎŞî rê bîyê hêvî

în 9 kanûnê 2022 - 16:31

Hemserekê Daîreya Têkilîyanê Teberî yê Îdareyê Xoserî Çiya Kurdî dîyar kerd ke, derheqê hêrîşanê Tirkîya de belgeyî erşawîyayê dewletanê ewrûpa.

Hêrîşê Tirkîya vera Bakur û Rojhelatê Sûrîyeyê dewam kenê. Hemserekê Daîreya Têkilîyanê Teberî yê Îdareyê Xoserî Çiya Kurdî derheqê hêrîşanê Tirkîya de ANHA rê qisey kerd û dîyar kerd ke Tirkîya wazena qirkerdişêk bikera.

‘Hêrîşî DAÎŞî rê benê hêvî’

Çiya Kurdî dîyar kerd ke hêrîşan de Kampa Holî û Hepisxaneyê Çirkînî hedef gêrîyayê û va, “Hêrîşan de ewleyîya nê cayan ra xeylê kesî şehîd bîyê. No mesajêk o. Dewleta Tirke wazena DAÎŞijan biremna û înan newe ra hêzdar bikera. Wazena înan sey qertê bazarîye bişuxilna. DAÎŞ hêrîşanê dewleta Tirke ra hêvî geno û goreyê malûmatan hedreyîya hêrîşan keno”

Kurdî derheqê hêrîşan de va, “Meseleyê ekonomîkî, sîyasîyî û weçinitişî estê. La tena weçinitişî reyde girêdayî nîyê. Badê weçînitişî hukmat awan bibo zî, ê do vera xoverdayîşê şarê ma bê. Sîyasetê înan do dewam bikero. Ma ganî xo mexapînê, no polîtîka tarîxî yo û do dewam bikero. Coka ma ganî vera nê sîyasetê qirkerdoxî xoverdayîşê xo pîl û hîra bikerê ke, ma bieşkê verê înan bigerê.”

‘Ma belgeyi erşawitê cayanê muhîman’

Çiya Kurdî dîyar kerd ke hêrîşê Tirkîya sûcê şerî yê û va, “Nê sûcî Efrîn ra heta Serêkanîyê serran ra nat dewam kenê. Ma kenê ke nê sûcan hetê dîplomatîk û hiqûqî ra tespît bikerê ke dewleta Tirke mehkema biba. Ma xeylê dewletan de û cayan de temasî nayê ro. Ma derheqê hêrîşan de malûmatî dayê komelê mîyannetewî. Eke vera hêrîşan ê bêveng bimanê, ê zî do bibê şerîkê hêrîşanê qirkerdişî. Eke hêrîşî mevindê, teröre DAÎŞî do reyna pîl bibo û zirar bido her kesî. Ma do meeşkê sey verî xoverdayîş biramnê.”

MERKEZÊ XEBERAN

parvê bike

   

Yeni Özgür Politika

© Copyright 2024 Yeni Özgür Politika | Mafên belavkirinê parastî ne.