Cuyêka dekerdî

în 7 Çileyê 2022 - 01:40

  • Bîyografîyê M. Malmîsanijî, hetê Mutlû Canî ra sey kitabî ame amade kerdene.

Ez wazena biney behsê xebatanê M. Malmisanijî bikerî û dima zî derheqê xebata bîyografî de tayê malûmatan bidî.
M. Malmîsanij, serranê 1970an de dest bi xebatanê xo yê ziwanî kerdo. Kovara Tîrêjî 1979 û 1980 mîyan de vejîyayo û na kovare Kurdistanê Bakûrî de kovara safî bi kurdkî ya verên a. M. Malmîsanijî, na kovare hem bi Kirmanckî hem zî bi Kurmancî weşanaya. Fergengê Tirkî-Kirmanckî yê verênî 1987î de veto. Badê darbeya 12 Êlule şîyo Swêd û xebatê xo uca de zî bêvindertiş dewam kerdê. Hîris serran ra dima reyna agêra welatê xo û welat de bi seyan wendekarî rasnayî. M. Malmîsanij, 20 ra zêderî kitabê telîfî nuştê. O sey ziwannasêk yeno naskerdiş la raşta zî semedê kurdan tarîxnasêko pîl o. Xebatanê xo yê tarîxîyan de hîna zêde tevgerenê sîyasîyanê kurdanê modernan ser o xebitîyayo. Înan ra teber xeylê kitabê ey açarîyayê ziwananê bînan û xebatanê ey ser zî xeylê kitabî vejîyayê. Xebata Mutlû Canî zî nê xebatan ra yew a û xebatêka erjîyayî ya. M. Malmîsanij hema zî bi enerjîyêkî berzî welatê xo de, mîyanê şarê xo de xebatanê xo yê erjîyayan dewam keno û awe dano dara Kirmanckî.

No merdim qet nêvinderto     

Xebate, Weşanxaneyê Darayî ra çape bîya û 2021î de vejîyaya. Raşta zî nuştox bi sîstematîk xebitîyayo û xebatêka başe amade kerda. Bîyografî domantîya ey ra dest pê kena, dima serrê zaningehî, xebatê sîyasî, xebatê ziwan û tarîxî û raseno heta dîaspora û detayanê cuya ey. Wexto ke merdim kitabî wanono, xo zerrî de vano no merdim qet nêvinderto. Xususen ma vajê, xebata Mutlû Canî xebatêka serkewtî ya. Peynîya kitabî de albumekî fotografan zî ezto û ma nê fotografan ra raywanîyêka derge û rindeke vînenê. Mîyanê kurdan de hema vaje zêderîyê kurdan M. Malmisanijî şinasnenê la kesê ke biwazê ey hîna nêzdî ra bişinasnê ganî xo birasnê na xebata delale. 

MERKEZÊ XEBERAN

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.