Dînç: Seba ke tecrîd bişikîyo, ma ganî pêro pîya xo ver bidê

• Wasîyê Abdullah Ocalanî û awiqatanê Buroya Hiqûqî ya Seserre ra Mazlûm Dinç panelê komploya 9ê Teşrîna Verêne de qisey kerd.

Hetê HDP Çewlîgî ra derheqê komploya 9ê Teşrîna Verêne de panelêk ame viraştene. Wasîyê Abdullah Ocalanî aqiqat Mazlûm Dînç beşdarê panelî bi.

Mazlûm Dînçî va, “Zaf cîhetê na komploye estê. Sere de Amerîka û hêzanê hegemonan waştêne şerî rojhelatê mîyanênî ra vila bikerê. Coka Birêz Ocalan hedef gêrîya. Polîtîkayê tasfîyekerdişî ame ramitene. Birêz Ocalan û hereket xoser û azad bî û no sebeb ra bîyê hedef û Birêz Ocalan mecbûr mend ke Sûrîye ra bivejîyo.”

‘Dewletî goreyê hiqûqî tênêgêrayê’

Dînçî va, “Birêz Ocalan seba ke meseleya Kurdan bi rayanê demokratîkan çareser bikero şi Ewrûpa. Senî ke linge na erdî ro komploye ferq kerde. Nê dewletî goreyê hiqûqî tênêgêrayê. Waştişê ci yê îltîcayî nêame ca û dima Rûsya zî eynî tewir têgêra. Seba îltîcayê Birêz Ocalanî 298 parlamenteran muraceat kerd la dewletan menfeatanê xo ver destûr nêda nê çîyî. Birêz Ocalan Yûnanîstan ra erşawîya Kenya. Dima reyna Yûnanîstan de 15ê Sibate de bi komploya mîyannetewîye esîr gêrîya.”

Îmrali de sîstemê îşkenceyî ame awankerdiş

Derheqê prosesê Îmraliyî de Dînçî va, “Îmrali de sîstemê îşkenceyî ame awankerdiş. Tîya ame vengkerdiş û tena seba Birêz Ocalanî ame hedrekerdiş. Mehkemayî sey formalîteyî ameyê viraştene. Dosyaya dewa 17 hezar rîpelî ra ameyêne pê la aşmêk de ameye qedînayîş. Zaf dîyar bi ke no qerarêko sîsasî bi. Dima 29ê Hezîrane de qerarê îdamî ame dayene û no tarîx zî tesadufî nêbi. 29ê Hezîrane de Şêx Seîd amebi îdamkerdiş û înan waşt mesaj bide Kurdan.”

‘CPT berpirsîyarîya xo nêano ca’

Dînçî va, “12 serrî ra nat pêvînayîşî yenê astengkerdiş. Birêz Ocalan û tepişteyê bînî binê tecrîdî de yê. 2015î ra dima tecrîd hîna ame girankerdiş. Nika zî eynî tewir dewam keno. Mektubî û pêvînayîşî yenê astengkerdiş. Ma CPT rê xeylê muraceatî kerdê. CPT ra veng nêvejîyeno. CPTyî eşkera kerdo ke wextêk ra ver hetê înan ra Îmrali rê zîyaretêk bîyo. Berpirsîyarîya CPTyî esta ke şertanê hepisxaneyan ser cigêrayîşan bikero la Îmrali de berpirsîyarîya xo nêano ca. Ê zî qebul kenê ke tecrîd nîno qebulkerdiş. Hepsîyêk tewr zêde 15 rojî hucre de maneno la Birêz Ocalan 24 serrî yo ke binê tecrîdî de yo.”

‘Ocalanî komplo puçe kerde’

Dewamê qiseykerdişê xo de Dînçî va, “Birêz Ocalanî bi xoverdayîşê xo komplo puçe kerde. Ey bi paradigmaya xo rayîr mojna û fikrê xo rasnayê şarî. Heqê hêvîye ra ame mehrûmkerdiş. Na ceza îdamî ra xirabêr a. Îşkenceyo zaf pîl o ke merdimêk heta mergê xo hepis de bimano. Seba ke qerarê xo bixeripna hetê Mehkemaya Heqanê Merdiman a Ewrûpayî ra malûmatêk ame dayene la Tirkîya hema zî çîyêk nêkena. Mehkema ganî Tirkîya ser de tehda bikera la nêkena.”

Pêro pîya xoverdayîş

Mazlûm Dînçî peynî de va, “Dezge û sazgeyê mîyannetewî derheqê trcrîd û rewşa Bİrêz Ocalanî de vengê xo nêkenê. Menfeatê înan esto û na bêvengî sîyasî ya. Meseleyê Birêz Ocalanî tena hiqûqî nîya. Ma verî cû zî dî, wexto ke Birêz Ocalanî de pêvînayîşî benê komel de hêvî peyda bena. Nêverdenê Birêz Ocalan tek qale vajo. Tersenê. Eşkera yo ke Birêz Ocalan qisey bikero meseleyi çareser benê. Aye ra seba şikitişê tecrîdî ganî her kes xo ver bido. Tena Kurdî ney ganî şarê dinya zî game bierzê. Seba ke haştîye awan biba ma ganî pêro pîya vera tecrîdî xo ver bidê.”

Badê qiseykerdişê Dînçî, panel bi pers û cewaban ame qedîyayîş.

MA / ÇEWLÎG