Hetê Odaya Tabîban Amedî ra Semsûr de polîklînîk amebi akerdene. Doktoranê tîyayî ra Firat Akengînî dîyar kerd ke, ganî hîna zêde xebatkarê sihetî yê cinîyî bibê.
Odaya Tabîban a Amedî, Semsûr de polîklînîkêk ronabi û no polîklînîk 50 çadiran ra ameyenê pê. Sekreterê Pêroyî yê Odaya Tabîban a Amedî Dr. Firat Akengînî va, “Ma Semsûr de 3 doktorî estibî. Polîklînîk de xebatkarê KESKî zî estibî. Çend ma dest ra ame, ma xo rasna dewan û ma waşt xo birasnê şarî.”
‘Îhtîyacîyê cinîyan têpîya manenê’
Akengînî va, “Doktorî cinîyî kêmî bî. Welatîyî raştê zehmetîyan ameyêne. Kesê ke seba hetkarî bi zerrî ameybî, ekserîyê înan camêrd bî. Xebatkaranê sihetî mîyan de zî rewşe eynî bî. Coka cinîyan xo rehet hîs nêkerdêne.”
Ganî goreyê kulturî kinc û werdî bêrê erşawitiş
Akengînî dîyar kerd ke, xususen kincanê kokiman rê û domanan rê îhtîyacîye esta û va, “Werd û kincê ke kulturê mintiqa de çin ê yenê erşawitiş. Ma dî ke domanî arayîye nêkenê. Çimkî werdê ke ameyê erşawitiş kulturê înan de çin ê. Reyna kincê ke kulturê mintiqa de çin ê ameyê erşawitene. Coka zaf kesî hema zî kincê xo nêbedilnayê. Cayê mendişî qîm nêkenê û problemê hîjyenî peyda benê.”
‘Ganî mintiqa de hîna zêde xebatkarê cinîyî bibê’
Akengînî dîyar kerd ke, erdlerze tewr zêde cinîyan û domanan ser o tesîr kerd û va, “Pedî, hebê kontrolî, testî, kincî, heta cinîyêk çine ba nînê waştene. Coka ganî hîna zêde xebatkarê cinîyî bibê. Doktoran û xebatkaranê sihetî ra amebi vatene ke, 20ê Sibate de wa dest bi karî bikerê. Merdimanê înan cuya xo vîdî kerde û ê kenê ke keyeyanê xo cayêko ewle de cabikerê. Ganî herinda înan, bajaranê bînan ra xebatkarî bêrê wezîfekerdiş.”
MA / DÎYARBEKIR
parvê bike
Nûçeyên ku dikare bala we bikşîne
