HDP ra kampanyaya ‘Ma keyeyan anê têhet’

pêncşem 23 sibatê 2023 - 18:18

  • Merkezê Koordînasyonê Krîzî yê HDPyî, startê kampanyaya ‘Ma keyeyan anê têhet’î da û gazîya paştîdayîşî kerde.

Erdlerze ra dima, xebatê Merkezê Koordînasyonê Krîzî yê HDPyî dewam kenê. Kampanyaya ‘Ma keyeyan anê têhet’ zî dîyaya dest pêkerdene. Hetê Merkezê Krîzî yê HDPyî ra kombîyayîşê çapemenîye ame viraştene.

‘Ma bi pêro endamanê xo mintiqa de yê’

Hetkara Hemsereka Pêroyî ya Rêxistinîya HDPyî Ozlem Gunduze va, “Ma nêzdîya 1000 TIRî erşawitê mintiqaya erdlerze. Ma merkezê paştîdayîşî ronayê û ma waşt xo birasnê her kesî. Ma kon û konteyneri erşawitê. Ma sobayî, komir û kolîyî erşawitê. Ma mitbaxî awan kerdê. Tena merkezan ney, ma xo rasna dewan zî. Hetê Meclîsa Cinîyan ra hewcedarîyî erşawîyayê mintiqa. Hetê Medclîsa Ciwanan ra warê cuyayîşî ameyê awankerdiş.”

‘Xebatanê ma ver nêrehet bîyê’

Gunduze derheqê tedayanê îqtîdarî de qisey kerd û va, “TIRê ma ameyê astengkerdiş, dest nîyayê konan ser, embazê ma gêrîyayê binê çimî û Bazarcux de qeymeqamo qeyyûm dest na merkezê paştîdayîşî ser. Şarê ma nê pêroyî dîyê. Hetê komîsyonê hiqûqî ra nê pêroyî ameyê raporkerdiş. M abi paştîdayîşan xebatanê xo ramnenê la nê xebatê ma qîm nêkenê. Na afatêka pîl a. Ma ganî bi paştîdayîşî na rewşe ra bivejîyê. Eke dest menîyêne beledîyeyanê ma ser, ma do hîna zêde hetkarî bikerdêne.”

‘Ma wazenê bibê pirdêk’

Gunduze derheqê kampanya de malûmatî dayê û va, “Ma ganî paştîdayîşan pîl bikerê. Ma wazenê bi kampanya keyeyan biyarê têhet. Ma wazenê bi bingeyîya dostanî û paştîdayîşî keyeyan biyarê têhet. Ma wazenê mîyanê keyayan de bibê pirdêk. Ma wazenê tewr kêm 4 aşmî keyeyê destegîrî debareyê keyeyekî bigerê xo ser û îmkananê xo înan reyde pare bikerê. Ma do bi paştîdayîşan cuye newe ra awan bikerê.”

MA / DÎYARBEKIR

parvê bike

   

Yeni Özgür Politika

© Copyright 2024 Yeni Özgür Politika | Mafên belavkirinê parastî ne.