‘Seba ke verê koçkerdişî bêro girewtiş wextê paştîdayîşî yo’

Heyetêk kona ke hetê DADî ra Meletî de ameybî ronayene zîyaret kerd û va, “Seba ke şarê ma erdê xo û keyeyanê xo terk mekero nika wextê paştîdayîşî yo.”

Hemserekê DAD(Komelê Elewîyanê Demokratîkî)î, Musa Kûlû û Saîme Topçû, îdarekararanê DÎK û DÎAYDERî, Parlamenterê HDPyî Nîmetullah Erdogmûş û Hemverfekê Masaya Îslamî ya HDPyî Dîba Keskîn û Emîn Ayî kona DADî ya ke Meletî de ameya ronayene zîyaret kerd. Bi nameyê heyetî Hemserekê DADî Mûsa Kûlûyî qisey kerd, bale ante domananê bêrefaqatan û dîyar kerd ke, ê teqîbkarê mesele yê.

‘Wextê têhet de vindertişî yo’

Kûlûyî ra dima Masaya Îslamî ya HDPyî ra Emîn Ayî qisey kerd û va, “Erdlerze afatêka xozayî ya. La polîtîkayanê rantî yê îqtîdarî ver felaketêk qewimîya. Ma nika verê kona DADî de yê. Ganî her kes paştî bido mexdûranê erdlerze. Seba ke şarê ma erdê xo û keyeyanê xo terk mekero nika wextê paştîdayîşî yo. Eke şar tîya ra koç bikero, no do bibo sey erdlerza bîne. Seba ke verê koçkerdişî bêro girewtiş nika wextê paştîdayîşî yo.”

MA / MELETÎ