CDK ra vera hêrişan gazîya yewîtîye

Vera hêrişanê Tirkîya hetê CDKyî ra gazîya yewîtîye ameye kerdene.

Hêrişa Tirkîya de Hemsereka Meclîsê Kantonê Qamişloyî Yusra Derwêşe, hektara ci Lima Şiwêş û şoforê ci Firat Tûma cuya xo vîndî kerde. Derheqê hêrişe de hetê CDKyî ra malumatêko nuştekî ame dayene.

Malumatî de ame vatiş ke, “Tirkîya Kurdistanê Fedarelî de kîmyewîyî gurînena, wazena Iraqî reyde Şengalî bêstatu verdo û Rojava de bi hêrişan sivîlan qetil kena. Na hêrişe vera merdimîye ameya kerdene. Sere de hetê NYyî û rêxistinanê hiqûqî ra veng nêvejîyeno û paştî dîyena hêrişan.”

NY rê gazîye

Hetê CDKyî ra hêrişe ameye şermezarkerdene û ame vatiş ke, “Ma partî, sazî û rêxistinanê Kurdan rê gazîye kenê ke wa destûr medê ke destkewteyê Kurdan dest ra şorê û ganî bêrê pawitene. Ma veng a NYyî û sazîyanê mîyannetewî danê ke wa vera nê hêrişan wezîfeyê xo biyarê ca.”

MA / AMED