Ehmed: Şar û hêzê ma bîyê yew

Endama Fermandarîya Pêroyî ya QSDyî Newroz Ehmede derheqê hêrişanê vera Rojawanî ercnayîşî kerdî û wina vat: “Şarê ma zî sey ma bingeyê Şerê Şarî yê Şorişgêrî de têgêreno. Hînî şar û hêzê ma bîyê yew.”

Endama Fermandarîya Pêroyî ya QSDyî Newroze Ehmede derheqê hêrişanê îşxalî yê dewleta tirke yê vera Rojawanî û têkoşînê QSDyî de ANFyî rê qisey kerd.

Newroz Ehmede bale ante ser ke dewleta tirke ya îşxalkere şerê Ukrayna-Rûsya xo rê kerd firsend û hêrişê Rojawanî kerd. Newroz Ehmede vist vîrî ke dewleta tirke bi bahaneya madeya 51. ya Neteweyanê Yewbîyayeyan (NY) vana a 30 kîlometre sînoranê xo pawena la qasê 60 kîlometre kewta zerreyê Rojawanî.

Newroz Ehmede wina vat: “Dewleta tirke Rojawan de sîvîlan kena hedef, qirkerdişan kena. Reyna dewleta tirke binawanîya şaristanan, bînayanê xizmetê komelkî, waranê petrol û sotemenî kena hedef. Dewleta tirke bi nê hawayî kena ke şar koç bikero. Dewleta tirke bêvengîya rayaumûmîya mîyanneteweyîye ra hende hêrişê xo giran kerdî.

Nika dewleta tirke game bi game aver şina û wazena peynî de pêro herême îşxal bikera. Ma vera hêrişanê sererdî yê muxtemelan amadekarîya xo kerde. Şarê ma zî wa amade bibo. Hêrişanê dewleta tirke ra zaf hêzê sey DAÎŞî wazenê bêrê xo ser û herême de serdest bibê. Sey hêzanê leşkerîyan amadekarîyê ma xurt ê. Ma wayîrê tecrubeyan û moralî yê. Şarê ma zî sey ma bingeyê Şerê Şarî yê Şorişgêrî de têgêreno. Hînî şar û hêzê ma bîyê yew. Senî ke ma hêrişanê sey Zîndanê Sînaa de şarê xo reyde têgêrayî ma vera nê hêrişan zî şarê xo reyde têbigêrê. Ma her wextî ra hîna bihêz ê. Yewîya şar û hêzanê leşkerîyan do hêrişan pûç bikera.”

XWEBÛN