Emîne Osê: Hêrîşê Tirkîya îlanê şerî yê

EHMED EL ESAF / ANHA / REQA

Hetkarê Hemsereka Îdareyê Xoserî yê Bakur û Rojhelatê Sûrîyeyî Emîne Osê va, “Ma do vera hêrîşan heqê xo yê pawitişî bigurînê.”

Tirkîya vera Bakur û Rojhelatê Sûrîyeyî hêrîşanê xo zêdînena. Bi çekanê giranan keye û merkezê xizmetan hedef gêrîyenê. Hêrîşan ver sîvîlî ameyê qetilkerdiş.

Hetkara Hemsereka Îdareyê Xoserî yê Bakur û Rojhelatê Sûrîyeyî Emîne Osê derheqê hêrîşanê Tirkîya de qisey kerd. Emîne Osê va, “Hêrîşê Tirkîya îlanê şerî yê. Bevengîya xo ver hêzê mîyannetewîyî zî benê şerîkê nê hêrîşan. Hêrîşanê 17ê Tebaxe de xeylê kesî şehîd bîyê. Ganî vernîyê nê hêrîşan bêro girewtiş. Nê hêrîşî vera Bakur û Rojhelatê Sûrîyeyî û seranserê Sûrîyeyî ameyê kerdene.”

‘Ganî Hukmatê Şamî vengê xo berz bikero’

Emîne Osê va, “Hetê Tirkîya ra eskerê rejîmî zî ameyê bombakerdiş. Ganî Hukmatê Şamî vera nê hêrîşan vengê xo berz bikero. Şar ganî erdê xo terk mekero. Tirkîya hêverî waşt hêzanê mintiqaye de pêbêra la no çîyêk rê nêbi. Dima Tirkîya bi SÎHAyan hêrîşî kerdê. Tirkîya her roje sûcanê şerî kena. Wazena projeya Îdareyê Xoserî çin bikera û mintiqaye îşxal bikera. Ma do pêro sûcanê Tirkîya rapor bikerê û hesabê înan bipersê.”

‘Tirkîya zor dana ma ke ma cewab bidê’

Emîne Osê peynîyê qiseykerdişê xo de va, “Tirkîya zor dana ma ke ma cewab bidê. Ma şer nêwazenê la eke hêrîşê Tirkîya ke dewam bikerê, hêzê ma do heqê xo yê pawitişî bigurînê. Ma zaf rey gazîya komela mîyannetewîye kerde ke vera hêrîşanê Tirkîya mîsyonê xo ca biyara. Ma reyna vanê ke, ganî hêzê mîyannetewîyî û komela mîyannetewîye wezîfeyanê xo ca biyarê û nêtîceyanê nê hêrîşan bifikirê.”