Enstîtuya Orkestraya Domanan a Rojavayî nifşanê ameyoxî rasnena

Nûçeyên Çand/Huner

yekşem 21 tebaxê 2022 - 16:46

  • Enstîtuya Orkestraya Domanan a Rojavayî seba ke muzîkê Kurdkî hetê akademîkî ra aver de bera xebitîyena.

Seba ke kultur û hunerê Kurdan bikirişîyê nifşanê newîyan, hetê Komîsyonê Hunerî yê Îdareyê Xoserî ra Enstîtuya Oskestraya Domanan a Rojavayî ameye awankerdiş. Enstîtu wazena qebîlîyetanê domanan aver de bera û înan perwerde bikera. 

Mamosteyanê enstîtuye ra Mizgîn Tahîre va, “Orkestra xeylê wextî ra nat est a la hêrîşan ver xebatê ci apey de mendê. Ez 3 serran ra nat perwerde dana domanan. Ma wazenê bin a projeye domanan şerî ra dûrî bigerê. Hetêk ra zî ma wazenê qebîlîyetanê domanan aver de berê. Domanî sey bezreyî yê. Eke ti awe bidî do qame bierzê. Seba ke kultur û huner aver de şêrê, ganî ma nifşa newîye ser o bifikîrîyê. Enstîtuya Orkestraya Domanan a Rojavayî serê nê bingeyî de ameye awankerdiş.”

“Ma wazenê muzîkê Kurdkî aver de şêro”

Mizgîn Tahîre va, “Enstîtuya ma de xeylê enstrumanî est ê. Ma wazenê kulturê muzîkî aver de şêro. Ma muzîkê dinyaye ra havile genê. Hetêk ra zî ma wazenê muzîkê Kurdkî û yê Rojhelatê Mîyanênî hetê akademîkî ra aver dê şêrê. Enstîtuye de 8 serran ra heta 17 serran domanî est ê. Domanî 3 astan de pewerde genê. Badê nê astan, ma averşîyayîşanê înan de eleqadar benê. Ma do orkestraya Kurde awan bikerê. Tedeyîya perwerdeyî de, muzîko teorik, veng, enstrumanî û dersa îngîlîzkî est ê.”

“Mîyanê şerî de zî aver de şina”

Tahîre va, “Rojavayî de mîyanê şerî de zî kultur û huner rasayê astêk. Ma nika Rojavayî de rewşa muzîkî başe vînenê. Verê şorişî nîya nêbi. Nika xeylê xebatê serkewteyî yenê kerdene. Bi nê xebatan Kurdistan de do kultur û huner aver de şêrê. Proseso ke ma nika tede yê xirab o. La reyna zî xebatî benê û nê îmkanî zaf muhîm ê. Seba averşîyayîşê qeyimî, akademîyan rê û aramîye rê hewcedarîye est a.”

Domanî vejîyayê sehne

Mizgîn Tahîre peynî de va, “Ma do hetê akademîkî ra perwerdeyê xo aver de berê. Domanî 3 reyî vejîyayê sehneyî ser. Reya peyêne Merkezê Kulturî yê Mihemed Şêxoyî de vejîyayê. Na game zaf muhîme bî. Bi na game bawerîya domanan zêdîyaye. Înan tersê xo zî şikit. Ma wazenê orkestraya domanan hîna aver de berê. Ez hêvî kena ma bieşkê perwerdeyê akademîkî bidê domanan.”

Hetê muzîkî de ziwan zî musenê

Mamesteya Îngîlîzkî ya enstîtuye Ronak Hecî va, “Perwerdeyê ziwanî zî zaf muhîm o. Ez dersa Îngîlîzkî dana domanan. Domanî ast bi aste perwerde genê. Ez verî cû xebatanê domanan de xebitîyana û nika zî tîya de perwerdeyê ziwanî dana domanan. Bitaybetî seba cigêrayîşan musayîşê ziwanan zaf muhîm o. No zî qebîlîyetanê domanan vejeno meydan.”

NÛJINHA / QAMIŞLO

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.