Eyup Barzanî: Ekonomîyê mintiqa binê destê Tirkîya de yo

duşem 11 tîrmehê 2022 - 12:44

  • Sîyasetmedaro Kurd Eyûb Barzanîyî va: PDK teslimê Tirkîya bîya û ekonomîyê mintiqa kewto destê Tirkîya.

Sîyasetmedaro Kurd Eyûb Barzanîyî va, “PDK teslimê Tirkîya bîya û ekonomîyê mintiqa kewto destê Tirkîya.”

Sîyasetmedar û nuştoxo Kurd Eyûb Barzanîyî polîtîkayê xeletî yê PDKye û krîzê ekonomîyî erjnayê. Barzanîyî vato polîtîkayanê xeletan ver şarê Başûrî kewto tenganîye. 

Sîyasetmedar Eyûb Barzanîyî va, “Başûrî de krîzê ekonomîyî pîl beno. Meaşî nînê dayene yan zî erey yenê dayene. Şar vera-vera beno feqîr. Barêko giran nişeno înan ser. Zengînî zî tim benê zengîn. Zengînî na rewşe ra qet tesîr nêgenê.”

Eskerê Tirkîya

Derheqê operasyonanê Tirkîya de Eyûb Barzanîyî va, “Şar operasyonanê Tirkîya ver nerehet o. Ma vînenê ke operasyonê înan zêdîyenê. Dewî, Koyî, daristanî yenê bombakerdiş. Vera-vera hîra benê. Tirkîya wazena bi eskeranê xo Başûr de ca biba. Bêusulîyê keyeyê Barzanîyî zî şarî nerehet kenê. Hesabê înan de pereyi zêdîyenê û mîyanê luksî de cuwîyenê. Kerdenê înan mîyanê şarî de yenê qiseykerdiş.”

Têkilîyê PDK û Tirkîyaye

Eyûb Barzanîyî derheqê têkilîyan de va, “Têkilîyanê Tirkîya û Başûrî de bi taybetî têkilîyanê Tirkîya û PDKye de bendî destê Tirkîya de yê. PDK nêşkena vera Tirkîya qerarêk bigera. Eke ti nê têkilîyan de şarê xo temsîl kena, menfeatê şarê xo û neteweyê xo fikirîyena, ganî ti vera Tirkîya cîya têbigera. Ez nêvana wa têkilîyî bin ra bibirîyê la ganî teslîm zî nêba. Têkilîye yewna çî ya, teslîmbîyayîş yewna çî yo. Tîya de teslîmbîyayîş esto. Tirkîya se vaja, vateyê înan ra nêvejîyenê. Na rewşêka zaf talukeyin a. Teyyaregehanê Başûrî de kontrole Tirkîya zêdîyenê.”

Muqaveleyê Petrolî

Derheqê meseleya petrolî de Barzanîyî va, “Muqaveleyanê petrolî de reyna kontrole Tirkîya estê. Vetişê petrolî de, rafînekerdişî de heta rotişê ci de kontrolê Tirkîya esto. Welhasil ekonomîyê Başûrî binê kontrole Tirkîya de yo. Îdareyê Başûrî şarê xo rê eşkeno vajo ney la Tirkîya rê nêşkeno çîyêk vajo. Kurdistanê Başûrî de xeylê eskerê Tirkan esto. Înan vernîyê Tirkîya akerd. Eskerê înan yenê, teyareyê înan yenê, ajanê înan yenê. Başûr bîyo cayêko bêwayîr. Tirkîya bîya axayê Başûrî. Tirkîya çîyêkî tor ê xizmet nêkena. Tirkîya qet nêbedilîyaya û polîtîkayê înan zî tim vera Kurdan ê.”

Meseleya Azadîye

Eyûb Barzanîyî va, “Ganî partîyê Kurdistanîyî yewbînî de bikewê têkilîye û mişewreyî bêrê kerdene. Çareserîye nîya awane bena. La eke partîyêk girêdayîya teberi biba no do senî bibo? Eke partîyî azad bibê meseleyî safî benê. Problem çinbîyayîşe azadîye yo. Eke îdareyêk azad nêbo, eşkeno îradeyê xo ramojno. La wexto ke binê tesîrê dewletêka îşxalkare de bibo no zaf zehmet o. Eke temsîlkarê partîyêk meeşkê wayîrê îradeyî bê, partîyê bînî senî eşkenê înan de biyerê têhet û meseleyêk çareser bikerê. Nika vanê seba ke PKK uca de yo Tirkîya ameya. Eleqayê xo çin o. Eke PDK PKK reyde raşta zî bikewtêne têkilîye û nê têkilîyî xurt bibîyêne mintiqa nêbîyêne wareyê şerî. Ê zî nika vateyanê Tirkîya tekrar kenê. Ganî Kurdî xo mîyan de meseleyanê xo bi îradeyanê xo bi aqilane û goreyê menfeatê miletê xo çareser bikerê.”

MERKEZÊ XEBERAN

parvê bike

   

Yeni Özgür Politika

© Copyright 2022 Yeni Özgür Politika | Mafên belavkirinê parastî ne.