Ganî her kes goreyê hêza xo vera tecrîdî bivejîyo

MUJDAT CAN / MA / RIHA

Birayê Abdullah Ocalanî Mehmet Ocalanî va, “Ganî xoverdayîşo demokratîk bêro pîlkerdene.”

Serekê PKKyî Abdullah Ocalan û hepsîyê bînî yê ke Îmrali de yê wextêkî dergi ra nat nêşkenê awiqat û keyeyanê xo de pêvînayîşan bikerê. Eşkera bîyo ke, 4ê Çeleyî de cezaya dîsîplînî ya 3 aşman ameya dayene. Mehmet Ocalanî na cezaya newîye rexne kerd.

‘Nêwazenê vengê ey bieşnawîyo’

Mehmet Ocalanî derheqê cezayanê dîsîplînî de va, “Çîyêko winasî nîno qebulkerdiş. Kesêk senî eşkeno mabênê çar dêsan de ceza bigero? No raşta zî îzehî ra dûrî yo. Nêwazenê vengê ey bieşnawîyo. Bi nê kerdenan şarî xapînenê. Merdim nêzano nê hiqûqî senî name bikero.”

Gazîya xoverdayîşê demokratîkî

Ocalanî va, “Sîstem nika nêwazeno derheqê meseleya Kurdan de vengê kesî bivejîyo. Vera ney zî xoverdayîşo sîyasî û demokratîk yeno dayene. Ma hinî nêzanê nê tecrîdî senî name bikerê. Ma ganî xoverdayîşê demokratîkî pîl bikerê. Çunke tecrîd vera kesekî ney, vera îradeyê yew şarî yeno ramitene. Ganî demokratî, roşnvîrî, şarî û her kes goreyê hêza xo vera tecrîdî bivejîyê. Seba ke tecrîd wedarîyo xoverdayîşêk esto la ganî bêro pîlkerdene.”