‘Ganî komele seba azadîya fîzîkî ya Birêz Ocalanî têbigêra’

• Hemserekê MED TUHAD-FEDî Zekî Baranî va, “Muxalefet zî derheqê polîtîkayanê şer û tecrîdî de sey îqtîdarî fikirîyeno.”

MAHMUT ALTINTAŞ / MA/ AMED

Serekê PKKyî Birêz Abdullah Ocalan binê tecrîdêkî giranî de yo. 25ê Adare 2021î ra nat ci ra xebere nêgerîyena û muraceatê pêvînayîşî ra zî netîceyêk nîna girewtiş.

Hemserekê MED TUHAD-FEDî Zekî baranî derheqê rewşe de qisey kerd û va ganî tecrîd bêro şikitiş û Birêz Ocalan azad bibo.

Netîceyê Tecrîdî

Zekî Baranî va, “Tecrîdî ver şer her roje giranêr beno. Krîzo ekonomîk û sîyasî zî girêdayîyê tecrîdî yê. Birêz Ocalanî tecrîdî de zî zaf çîyî musnayê komele. Birêz Ocalanî bi xoverdayîşê xo tecrîd puç kerd. Rol û mîsyonê Birêz Ocalanî mabênê 2013-2015î de hetê her kesî ra ameyê dîyayene. Şer vindert û kriz wedarîya û komele bîye asane. Birêz Ocalanî zaf kede daye la hetê şerwaştoxan ra tecrîd ame girankerdiş.”

Muxabatê Ocalanî çin o

Baranî va, “Problemê Rojhelatê Mîyanênî do hetê Ocalanî ra çareser bibê. Eke şerêk bibo, ganî xoverdayîşêk zî bibo. Muxatabê na meseleye dîyar o. Kurdan vato Birêz Ocalan îradeyê ma yo. Coka ganî Birêz Ocalan biraso azadîya xo ya fîzîkî. Birêz Ocalan ganî bieşko rol û mîsyonê xo ca biyaro. La çi heyf ke muxatabê Birêz Ocalanî çin o.”

Polîtîkayê muxalefetî

Derheqê polîtîkayê muxalefetî de Zekî Baranî va, “Partîyê muxalefetî polîtîkayanê şer û tecrîdî de sey îqtîdarî fikirîyenê. Muxalefet ganî vera tecrîd û şerî vengê xo bikero û cayê xo dîyar bikero. Derheqê azadîya Birêz Ocalanî de çi fikirîyenê. Derheqê hêrîşanê çekanê kîmyewîyan de çi fikirîyenê. Hêrîşanê Rojavayî ser o çi fikirîyenê. Ê vanê beno ke Kurdî sey verî yê. Ê rojî vîyertê. Kurdî ewro paradîgmayê Birêz Ocalanî referans genê. Kurdî hînî nêxapîyenê. Eke wazenê azadîyêka mayînde awane biba, ganî Birêz Ocalan azad bibo. Vateyê bînî çîyêk îfade nêkenê.”

‘Ganî komele têbigêra’

Hemserekê MED TUHAD-FEDî Zekî Baranî peynî de va, “Ganî komele seba azadîya fîzîkî ya Birêz Ocalanî têbigêra. Eke ma Birêz Ocalanî fam bikerê, ma do ey azad bikerê. Ma eşkenê bi xoverdayîşî tecrîdî bişiknê.”