Ganî TTB seba pêvînayîşanê Îmraliyî gaman bierzo

• Awitaq Serdar Tumî dîyar kerd ke, ganî muracatê baroyan hetê TTByî ra bêrê erjnayene û gamî bêrê eştene.

MUJDAT CAN / MA / RIHA

Vera tecrîdî, hetê OHDyî ra Baroya Rihayî rê muracat ame kerdene. Baroya Rihayî zî muracatê Wezaretê Edaletî û TTByî kerd. Hema cewabêk nêdîyayo muracatê baroyî.

Endamê Şûbeya OHDyî ya Rihayî awiqat Serdar Tumî, derheqê têgêrayîşanê vera tecrîdî û muracatan de qisey kerd.

‘Îmrali de îşkence yeno kerdene’

Awiqat Serdar Tumî va, “Baroyî seba ke hiqûqî bipawê, heqê merdiman bipawê, awiqatan bipawê ameyê awankerdiş. Ma heqê xo yo qanûnî gurîna û seba ke hiqûq cayê xo bigero ma muracatê baroyan kerd. Baroya Rihayî muracatê ma erjna û hetê baro ra Wezaretê Edaletî û TTB rê muracatî ameyê kerdene. Hepisxaneyê Îmraliyî de heqê bingeyî yê girewteyan yenê binpaykerdiş û girewteyan rê îşkence yeno kerdene. Ma raya pêroyîya demokratîke rê gazîye kenê ke, wa vera nê îşkenceyî vengê xo berz bikera.”

‘Wa TTB gaman bierzo’

Tumî va, “Ganî muracatê baro hetê TTByî ra bêra erjnayene û gamî bêrê eştene. Ma sey awiqatan nêşkenê heqanê xo yê karî bigurînê. Yewîtîye seba ke heqanê awiqatan bipawa esta. Ma wazenê heqê ma bêrê pawitene û seba ke ma bieşkê muvekkîlê xo reyde pêvînayîş bikerê ganî gamî bêrê eştene.”

Awiqat Serdar Tumî dîyar kerd ke Abdullah Ocalan girewteyo normal nîyo û va, “Birêz Ocalanî reyde pêvînayîşî dest pêbikerê, na rewşa kaotîke do asanêre biba. Pêvînayîşî bibê, hetê sîyasetî ra zî do asanîye awane biba. Birêz Ocalan girewteyêko nnormal nîyo la o zî qasê girewteyan wayîrê heqan o. Ma wazenê wa nê heqê bingeyinî cabiyerê.”