Ma vera tecrîdî bikewe raye

• Hemsereka MED TUHAD-FEDî Safîye Akdage derheqê Rayîrşîyayîşê Gemlîkî de va, “Ma ganî bibê beşdarê nê rayîrşîyayîşî yê vera tecrîdî.”

Serekê PKKyî Abdullah Ocalan 24 serrî yo ke hepisxaneyê Îmraliyî de binê tecrîdî de yo. Vera komploya mîyanneteweyî û tecrîdî do 6ê Sibate de Qoser û Geverî ra rayîrşîyayîşêk ver bi Gemlîkî bêro dest pêkerdiş. Rayîrşîyayîş do 15ê Sibate de Gemlîk de biqedîyo.

Hedreyîyê rayîrşîyayîşî dewam kenê. Hemsereka MED TUHAD-FEDî Sayîye Akdage dîyar kerd ke, têkilîya polîtîkayanê şerî û tecrîdî pîya esta.

‘Hêrîşî giredayeyê tecrîdî yê’

Akdage va, “2022yî de Kurdî bi temamî raştê hêrîşan ameyê. Rojava rê hêrîşî bîyê, tîya de bi faşîzmê AKP-MHPyî hêrîşî ameyê ramitene û Başûr de zî reyna kîmyewîyî ameyê gurînayene. Her het ra Kurdî raştê hêrîşan ameyê. 24 serrî yo ke Îmrali de tecrîd yeno ramitene. Hepisxaneyan de zî hêrîşî yenê ramitene.”

‘Ganî tecrîd wedarîyo’

Akdage derheqê tecrîdî de va, “Cayêkî dinyaye de sîstemêko winasî çin o. Heta ke tecrîdo ke Birêz Ocalanî ser de yeno ramitene mewedarîyo, destkewteyê Kurdan do raştê hêrîşan bêrê û binê talukeyî de bê. Seba ke tecrîd bişikîyo û hêrîşî bêrê vindertiş, serrgêra komploye de do di peran ra rayîrşîyayîşêk bêro kerdene. Ma do seba şikitişê tecrîdî xebatanê xo bizêdînê û her het ra bixebitîyê. Paradîgmaya Ocalanî dinya de bîye nimuneyêk. Coka her cayê dinya de vera tecrîdî çalakîyî benê.”

Rayîrşîyayîşî rê gazîye

Akdage seba beşdarbîyayîşî gazîye kerde û va, “Ma do 2 hetan ra seba çareserîye ver bi Îmrali bikewê raye. Rayîrşîyayîş do 6ê Sibate de Qoser û Gewer de dest pêbikero û 15ê Sibate de Îmrali de biqedîyo. Ma Kurdan rê û şaranê bînan rê gazîye kenê û vanê; her ca de bibê beşdarê nê rayîrşîyayîşî û paştî bidê.”

MA / DÎYARBEKIR