Girewteyan ra CPT rê mektube
sêşem 18 nîsanê 2023 - 10:33
- Hepisxaneyê Sîncanî ra 68 girewteyan CPT rê mektube erşawite: Şima Tirkîya rê vêbeng bimanê do mergî bizêdîyê
Hepisxaneyê Sîncanî ra 68 girewteyan CPT rê mektube erşawite.
Hepisxaneyan de îşkence, surgun û binpaykerdişê heqan zêdîyayê. Hepisxaneyê Sîncanî de girrewteyo 63 serre Abdullah Oran krîzê qelbî ver cuya xo bedilnaye. Naye ser o hepisxaneyê Sîncanî ra 68 girewteyanê cinîyan CPT rê mektube nuşte.
Mergî zêdîyayê
Girewteyanê cinîyan mektuba xo de va, “Erdlerze û weçînayîşî ver rewşa hepisxaneyan kewena teberê rojevî. Merganê hepisxaneyan ra dewlete berpirsîyar a. Mergî zêdîyayê û no zî ramojnano ke ‘polîtîkaya îdamî’ yena ramitene. Eke vera nînan veng meyero vetene do rewşe hîna biba xirabe û eynî çî bêro serê embezanê ma yê hucreyan zî.”
Mudaxele bikerê
Mektube de waştişî ameyê rêzkerdiş û ame vatiş ke, “Ma şima ra wazenê ke, mudaxeleyê nê mergan bikerê, cigêrayîşan bikerê û rewşa hucreyayanê ke bîyê sey îşkencexaneyan raya pêroyîye de pare bikerê. Ma wazanê ke, şima nê polîtîkayan bivindarnê.”
YENÎ YAŞAM / ENQERA