Hemsereka Pêroyî ya Partîya Çepe Wisslere DBPyî zîyaret kerd

• Hemsereka Pêroyî ya Partî Çepe ya Elmane Janine Wisslere, Dîyarbekir de Hemsereka Pêroyî ya DBPyî Salîha Aydenîze reyde ameye têhet.

Hemsereka Pêroyî ya Partîya Çepe ya Elmane Janine Wisslere, parlamenterê Partîya Çepe Hakan Taşî reyde seba temasanê sîyasîyan ameyê Dîyarbekir. Înan DBP û TJAyî zîyaret kerd.

Hêverî DBPyî rê zîyaret ame kerdene. Wisslere tîya de Hemsereka Pêroyî ya DBPyî Salîha Aydenîze reyde ameye têhet. Wisslere zîyaretê xo de va, “Zîyaretê DBPyî seba ma zaf muhîm o. Seba ke şima ma kerdê mêman, ma zaf sipas kenê. Seba paştîdayîşî ma wazenê fikranê xo yewbînî de pare bikerê.”

‘Wa tecrîd bişikîyo’

Hemsereka DBPyî Salîha Aydenîze va, “Her roje operasyonê sîyasîyî yenê kerdene. Wa vînenê ke çar hetê Kurdistan de şer esto, kîmyewîyî yenê gurînayîş. Nêwazenê meseleya Kurdan bi rayanê demokratîkan çareser biba. Pêro krîzî tecrîdî ver peyda benê. Birêz Abdullah Ocalan wayîrê perspektîfê çareserîye yo. Seba ke tecrîd bişikîyo û fikrê ci birasê şarî, Kurdî û dostê Kurdan tim mîyanê çalakîyan de yê. Dewlete zî bi tecrîdî vera Kurdan dişmenetîya xo ramnena. Bi tecrîd û tasfîyeyî Kurdan rê îşkence yeno kerdene.”

Aydenîze dîyar kerd ke, tecrîd sûcêko mîyanneteweyî yo û va, “Dewletê komplokarî bi bêvengîye şerîkîya xo ramnenê. CPTyî dîyar kerd ke, ê pêvînayîşê peyêne de Birêz Ocalanî reyde nêameyê têhet û nê zî ma de qisawetî peyda kerdê. Coka şaro Kurd CPT û sazîyanê bînan ê berpirsîyaran xoser nêvîneno. Kurdî, nê tecrîdî û îşkenceyî qebul nêkenê û xoverdayîşê xo ramnenê. Tena seba pêvînayîşan ney seba azadîya fizîkî ya Birêz Ocalanî Kurdî û dostê Kurdan xoverdayîşê xo pîl kenê.”

Wisslere, dima zî TJAyî zîyaret kerd. Zîyaret, bê beşdarîya çapemenîye ame kerdene.

MA / DÎYARBEKIR