Bayindir: Ma do beranê Îmraliyî bişiknê û Ocalanî birasnê azadîya ci

• Hemserekê Pêroyî ya DBPyî Keskîn Bayindirî kongreya partî ya Êlihî de qisey kerd û dîyar kerd ke xoverdayîş do bêro pîlkerdene.

Rêxistinê DBPyî yê Êlihî, kongreya xo ya 1ine bi beşdarîya Hemserekê Pêroyî yê DBPyî Keskîn Bayindirî viraşte. Parlamenterî, Dayîkê Haştîye û endamê sazîyan bîyê beşdarê kongre.

‘Ma vera zîhnîyetê talankarî game têpîya nêeşte’

Kongre de Hemserekê Pêroyî yê DBPyî Keskîn Bayindirî qisey kerd û va, “Ma vera zîhnîyetê talankarî game têpîya nêeşte, ma do meerzê zî. Çend rojî verî cû laser werişt û 4 kesan cuya xo vîndî kerde. Xeylê kesî maxdûr bîyê. Roja verêne ra nata embazanê ma paştî da mexdûran. Ma embazanê xo rê sipas kenê. Qeyûm seba şovî şîyo mintiqaya laserî. Ma do şarê xo mihtacê kesî mekerê. Ma do bi paştîdayîşan birînanê xo bipêşê.”

Bayindirî va, “10 qatê zulmo ke Îsraîlî Filistînî rê kerdo hetê dewleta tirkan ra Kurdan rê ameyo kerdene. Zîhnîyeto ke nika Filistînî rê qaso xesasîyat ramojneno, Kurdan tena layiqê qetlîaman vîneno. Dewletê Rojhelatê Mîyanênî zî nê qetlîaman nêvînenê. Nika zî seba Filistînî gazîyan kenê. Ê tena şov kenê û heta nika gamêke nêameya eştene. No zî semîmîyetê înan ramojneno.”

‘Yan azadî yan azadî’

Bayindirî bale ante tecrîdî ser o û va, “Tecrîd, verê meseleyanê Rojhelatê Mîyanênî û meseleya Kurdan de bendêko pîl o. Îqtîqar wazeno bi şerî estbîyayîşê xo biramno. Ma înan ra vanê, proseso ke Birêz Ocalan tede çin bo çareserîye nêbena. Tek rayîrê çareserîye Îmrali yo. Seba çareserîya meseleyan ganî berê Îmraliyî abibê. Ma do beranê Îmraliyî bişiknê û Birêz Ocalanî birasnê azadîya ci. Ma do xoverdayîşî pîl bikerê. Yan azadî yan azadî.”
Bayindirî dîyar kerd ke do weçînayîşî de bi beşdarîya şarî do tora xoverdayîşî bêra awankerdene û va, “Ma do bi îradeyê şarê xo namzetanê xo dîyar bikerê. Tena Kurdistan de ney, bajaranê Tirkîya de zî ma do serbikewê. Ma do zîhnîyetê talakarî bierşawê. Îqt3idar wazeno wa ciwanî bi kungkerdoxan xoverdayîşî ra dûrî bikewê. Ma do destûr medê kungkerdoxan û polîtîkayanê îqtîdarî pûç bikerê.”

Hemserekîya DBPyî ya Êlihî rê Mehdîye Demîr û Resûl Çetîn ameye weçînayene.

MA / ÊLIH