Bayindir: Rayîrşîyayîşê Azadîye destpêkê dewrê neweyî yo

MA / Eylem AKDAG – Mujdat CAN / AMED

Hemserekê Pêroyî yê DBPyî Keskîn Bayindirî va, “No rayîrşîyayîş, rayîrşîyayîşê azadîye, rayîrşîyayîşê demokrasî, têduştî, edelet waştoxan û bindestan o.”

Serekê PKKyî Abdullah Ocalanî ra 32 aşmî yo xebere nîna girewtene. Eşkera bîyı ke 31ê Teşrîna Verêne de qedexeyê pêvînayîşan ê 6 aşman o newe ameyo dayene. Hetê parlamenteranê HEDEPî ra seba pêvînayîşan muracat kerd û meşte zî do ver bi Gemlîkî ‘Rayîrşîyayîşê Azadîye’ bêro kerdene.

Hemserekê Pêroyî yê DBPyî Keskîn Bayindirî derheqê tecrîd û rayîrşîyayîşê Gemlîkî de erjnayîşî kerdê.

‘Adresê çareserîye Îmrali yo’

Bayindirî dîyar kerd ke derheqê meseleya Kurdan û meseleyanê mintiqa de perskektîfê Abdullah Ocalanî dinya de ameyê qebulkerdiş û va, “No semed ra zî ganî tecrîdo ke yeno ramitene bêro wedartene. La îqtîdarê AKP-MHPyî tecrîdî de israr keno. Ma verî cû muracat kerdibi û tewr peynî ma 3yê Teşrîna Peyêne de muracat kerd la nê her di muracatî zî bêcewab mendê. Ganî na mesele de meclîs berpirsîyarî bigero xo ser. Heta ke na mesele safî meba, heqê merdiman û demokrasî nînê awankerdene. Dewlete do cewabê muracatanê ma cayê xo dîyar bikera.”

‘Rayîrşîyayîşê Azadîye do bêro kerdene’

Bayindirî dîyar kerd ke do Rayîrşîyayîşê Azadîye bibo destpêkê dewrê neweyî û va, “Derheqê rayîrşîyayîşî de 122 merkezan de hedreyîyê dewam kenê. Meseleya Kurdan her het ra cayêko krîtîk de ya. Ganî pêro şarî hetê demokrasî, hiqûq, haştîye û heqanê merdiman ra biewnê na mesele ra. Coka, rayîrşîyayîşê Gemlîkî zaf muhîm o. Şar wazeno wa tecrîd bêro wedartene û Birêz Ocalan çareserîye meseleya Kurdan de bieşko mîsyonê xo biyaro ca. 18ê aşme de do pêro bajarê Kurdistanê verê xo bidê Îmrali. Ma metropolan ra zî her kesî silaynenê nê rayîrşîyayîşî. No rayîrşîyayîş, rayîrşîyayîşê demokrasî, têduştî, edalet waştoxan û pêro bindertan o.”

‘DBP do rolêko sereke de bo’

Bayindirî peynî de va, “Ma her kesî ra vanê wa vera vê zîhneyetê şerwaştoxî bêrê têhet. No rayîrşîyayîş netîceyêk nîyo û no ma rê sey destpêkêk o. Ma do sey DBPyî, seba ke rayberîya Birêz Ocalanî de zemînêko sîyasî peyda bibo, xoverdayîşê xo kuçeyan de û meydanan de hîna xurt bikerê û ma do rol û mîsyonê xo biyarê ca.