DBP de hedreyîya konferansî: Konferansî de do bale biancîya tecrîdî ser o

DBP do 5ê Teşrîna Peyêne de Amed de konferansêk bivirazo. Endamê MYKyî yê partî Farûk Tatliyî dîyar kerd ke do bale biancîya tecrîdê Îmraliyî ser o.

Partîya Mintiqayanê Demokratîkan (DBP) do 12ê Teşrîna Peyêne de Enqera de kongreya xo ya 6ine bikero. Verê kongre hetê partî ra do Amed de konferansêk bêro viraştene. Yeno pawitene ke do Tirkîya û Kurdistanî ra xeylê kesî bibê beşdarê konferansî. Endamê MYKyî yê partî Farûk Tatliyî bale ante muhîmîya konferansî ser o û va ‘kongreya esase’ no komferans o.

Xerîtaya raye do bêra eşkerakerdene

Farûk Tatliyî dîyar kerd ke 2015î de partî ameye qickerdene û kongreya 2021î de qerar ameyo girewtene ke 20 bajaranê Kurdistanî de rêxistinîye bêra kerdene. Tatliyî dîyar kerd ke 5ê Teşrîna Peyêne de do konferanso pîl bêro viraştene û konferansî de xerîteya raye bêra eşkerakerdene.

Tatliyî va, “Senî ke yeno zanayene, partîyê sîyasîyî mecbûrê ke Enqera de kongreyanê xo bikerê. Ma do kongreya xo ya Enqera bi temsîlî bikerê. Ma do kongreya xo ya eslîye û konferansê xo Amed de bi şarî reyde bikerê. Xerîteya ma ya raygirewtişî û newe ra awanbîyayîşê ma do bêrê nîqaşkerdene.”

Gazîya beşdarîye

Tatliyî peynî de gazîye kerde û va, “Ma pêro şarê xo silaynenê konferansê xo. Konferansî de do bale biancîya tecrîdê Rayberê Şarê Kurdî Abdullah Ocalanî ser o. Qerarê ke seba şikitişê tecrîdî ameyê girewtene do bêrê eşkerakerdene.”

MA / AMED